Отбасы – алғашқы қорған

Астана қаласында «Зере» әйелдер қоғамының бастамасымен бала тәрбиесі, отбасылық қарым-қатынас және тұлғалық даму мәселелеріне арналған екі ағартушылық іс-шара өтті.

Кездесулер «Qamqor-Astana» қоғамдық қорының әлеуметтік жұмысы аясында ұйымдастырылды. Аталған жұмыстың негізгі бағыттарының бірі – діни экстремизмнің алдын алу. Екі іс-шараға барлығы 34 әйел қатысты.

Ұйымдастырушылардың пікірінше, жасөспірімдердің радикалды идеяларға қарсы тұру қабілеті ең алдымен отбасында қалыптасады. Ата-ана мен бала арасындағы сенімді қарым-қатынас, берік адамгершілік құндылықтар және сыни ойлау дағдылары жастарды теріс идеологиялық ықпалдан қорғауда маңызды рөл атқарады. Сондықтан профилактикалық жұмыстарды аналардан бастауға ерекше мән берілді.

Алғашқы іс-шара «Баланы ойын арқылы дамыту» тақырыбындағы шеберлік сабағы түрінде ұйымдастырылды. Нейропсихолог Г. Ахниязова ойынның бала мен ата-ана арасындағы байланысты нығайтудағы маңызын түсіндіріп, баланың эмоционалдық жағдайындағы өзгерістерді дер кезінде байқау тәсілдерімен бөлісті. Сабаққа 17 әйел қатысты.

Екінші кездесу кітап клубы аясында өтті. Қатысушылар Мақпал Жұмабаеваның «Педагогика» еңбегін талқылады. Кездесуде бала тәрбиесіндегі дәстүрлі құндылықтар мен заманауи әдістерді үйлестіру, отбасылық дәстүрлерді сақтау, адамгершілік қағидаларын қалыптастыру және айналадағы адамдарға құрметпен қарау мәселелері қозғалды.

Мамандар мұндай құндылықтардың жас ұрпақты жат идеологиялық ықпалдан қорғауға ықпал ететінін атап өтті. Кітап клубының кездесуіне де 17 әйел қатысты.

Ұйымдастырушылардың айтуынша, ашық пікір алмасу, тәжірибе бөлісу және мамандардан кеңес алу мүмкіндігі профилактикалық дәрістердің тиімділігін арттырады. Мұндай кездесулер отбасындағы өзара түсіністікті нығайтып, әлеуметтік байланыстарды күшейтуге және жастардың радикалды топтардың ықпалына түсу қаупін төмендетуге бағытталған.

Материал Астана қаласы ТҚК аппаратының ақпараты негізінде дайындалды