Биыл Ахмет Жұбанов атындағы Ақтөбе музыкалық колледжіне 55 жыл толып отыр. Жарты ғасырдан астам тарихында оқу орны талантты музыканттардың бірнеше буынын тәрбиелеп шығарды. Олардың қатарында әлемге танымал қазақстандық орындаушы Димаш Құдайберген де бар.
Мерейтойлық бағдарлама аясында колледж ардагерлерінің қатысуымен баспасөз конференциясы және Ахмет пен Ғазиза Жұбановтардың ескерткіштеріне гүл шоқтарын қою рәсімі өтті.
Баспасөз конференциясына музыкалық колледждің ардагерлері, консерваторияның қазіргі профессорлары және Башқұртстан Республикасының өнер қайраткерлері қатысты.
Мерейтойлық бағдарламаның маңызды оқиғаларының бірі қазақ музыкалық өнерінің көрнекті тұлғалары Ахмет Жұбанов пен Ғазиза Жұбанованың ескерткіштеріне гүл шоқтарын қою рәсімі болды.
Ахмет Жұбановтың ескерткішіне гүл себетін Ақтөбе облысының білім басқармасы басшысының орынбасары Нұргүл Бертлеуова мен ұлы композитордың шөбересі Жәңгір Жұбанов қойды.
Екінші гүл себетін Қазақстанның еңбек сіңірген мәдениет қайраткері, композитор, Құрманғазы атындағы Қазақ ұлттық консерваториясының құрметті профессоры Қайырғали Өсенғалиұлы Қожамбаев пен Ахмет Жұбанов атындағы Ақтөбе музыкалық колледжінің директоры Әсем Мұхалиева қойды.
Қайырғали Қожамбаев — көрнекті академик Ахмет Жұбановтың шәкірті әрі музыкалық колледждің алғашқы директоры. Ол оқу орнының негізін қалаушылардың бірі болып, оның қалыптасуы мен дамуына зор үлес қосты.
Колледждің 55 жылдық тарихы — музыканттардың, педагогтер мен орындаушылардың бірнеше буынының кәсіби қалыптасу жолы. Бүгінде оқу орнының түлектері Қазақстанның және шетелдердің жетекші шығармашылық ұжымдарында еңбек етіп, ұлттық музыкалық өнерді дамытуға үлес қосып келеді.
Колледждің танымал түлектерінің қатарында әлемге әйгілі қазақстандық орындаушы Димаш Құдайберген бар. Оның шығармашылығы Ақтөбе мен Қазақстанның атын халықаралық сахнада танытып жүр.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
