2026 жылғы 29 қазанда Қаржы нарығын реттеу және дамыту агенттігінің делегациясы Төраға Мәдина Әбілқасымованың басшылығымен ЕАЭО-ға мүше мемлекеттердің орталық (ұлттық) банктерінің валюталық саясат жөніндегі консультациялық кеңесінің 31-ші отырысына қатысты. Іс-шара Минск қаласында өтті.
Валюталық саясат жөніндегі консультациялық кеңес – Еуразиялық экономикалық одаққа мүше мемлекеттердің орталық (ұлттық) банктері мен қаржы реттеушілерінің консультативтік-кеңесші органы.
Дәстүрлі отырысқа Армения Орталық Банкінің, Беларусь Ұлттық Банкінің, Қазақстан Ұлттық Банкінің, Қырғызстан Ұлттық Банкінің және Ресей Орталық Банкінің басшылары қатысты.
Қатысушылар ағымдағы экономикалық жағдайды, ЕАЭО-ға мүше мемлекеттерде ақша-кредит саясатының іске асырылуын талқылады, алаяқтық операцияларға қарсы іс-қимыл бөлігінде тәжірибе алмасты, цифрлық валюталарды пайдалану және енгізу перспективалары, сондай-ақ виртуалды активтерді реттеу мәселелерін қарады.
Отырыс аяқталғаннан кейін Еуразиялық экономикалық одақ шеңберінде қаржы нарығындағы өзара іс-қимылды күшейтуге бағытталған бірқатар келісімдерге қол қойылды.
Консультациялық кеңестің кезекті отырысы келесі жылы Ресейде өтеді.
Сыртқы коммуникациялар басқармасы
