БАЛАНЫҢ ДАМУЫНА ЕРТЕ БАСТАН ҚОЛДАУ: ТАРАЗДА ПАТРОНАЖ ҚЫЗМЕТІ ЖЕТІЛДІРІЛУДЕ

БАЛАНЫҢ ДАМУЫНА ЕРТЕ БАСТАН ҚОЛДАУ: ТАРАЗДА ПАТРОНАЖ ҚЫЗМЕТІ ЖЕТІЛДІРІЛУДЕ

Баланың денсаулығын қорғау тек медициналық тексерумен шектелмейді. Оның қауіпсіз ортада өсіп, үйлесімді дамуы үшін отбасына дер кезінде қолдау көрсету де маңызды. Осы бағытта Тараз қаласындағы №5 қалалық емхана базасында «Ерте жастағы балаларға патронаждық қызмет көрсетудің әмбебап прогрессивті моделі» тақырыбында бағдарлау семинары өтуде.

Іс-шараны Жамбыл облысы әкімдігі денсаулық сақтау басқармасы ұйымдастырған. Семинарды әмбебап прогрессивті патронаждық модель бойынша ұлттық тренер Наталья Ким жүргізуде. Оған аудандық ауруханалар мен Тараз қаласындағы алғашқы медициналық-санитариялық көмек ұйымдарының бас дәрігерлері және олардың орынбасарлары қатысуда.

Оқытудың негізгі мақсаты – медициналық ұйым басшыларының патронаждық қызметті тиімді ұйымдастыру, жаңа модельді тәжірибеге енгізу және оның сапасын бағалау бойынша кәсіби құзыреттерін жетілдіру.

Семинарда баланың қажеттілігін ерте анықтау және отбасыға жеке қолдау көрсету мәселелеріне ерекше назар аударылуда. Қатысушылар баланың денсаулығы мен дамуына әсер ететін қауіп факторларын бағалау, патронаж мамандарының жұмысын үйлестіру, ведомствоаралық байланысты нығайту және көрсетілетін қызметтің сапасын бақылау тетіктерін қарастыруда.

Теориялық білім практикалық тапсырмалармен ұштастырылып, әмбебап прогрессивті модельді медициналық ұйымдардың жұмысына енгізу жолдары талқылануда.

Бұл модельдің ерекшелігі – әр отбасының қажеттілігін ескере отырып, қолдауды саралап көрсету. Яғни патронаж қызметі баланың денсаулығын бақылаумен қатар, оның қауіпсіздігіне, күтіміне және үйлесімді дамуына ықпал ететін жағдайларды бағалауға мүмкіндік береді.