2026 жылғы 25-27 қазанда Доха қаласында БҰҰ-ның Сауда және даму жөніндегі конференциясы (ЮНКТАД) мен Қатар Мемлекетінің бірлесіп ұйымдастыруымен БҰҰ-ның 9-шы Дүниежүзілік инвестициялық форумы (World Investment Forum 2026) өтуде. Форумда Қазақстан делегациясын Қазақстан Республикасы Сыртқы істер министрінің орынбасары Ардақ Зебешев басқарды.
Форум аясында А. Зебешев «2026 жылғы Дүниежүзілік инвестициялар туралы баяндама – ЮНКТАД-тың Дүниежүзілік инвестициялық форумы назарындағы ЕАЭО өңірі» (World Investment Report 2026 – EAEU Region in the Spotlight of the UNCTAD World Investment Forum) сессиясында және «Болашақтың негізін қалаушыларға инвестиция салу» (Investing in the Future Builders) тақырыбындағы кәсіпкерлік жөніндегі министрлік дөңгелек үстелінде сөз сөйледі.
ЕАЭО өңіріне арналған сессияда сөз сөйлеген А. Зебешев 2019 жылдан бері Қазақстан экономикасының 30%-ға өскенін, ал орташа жылдық өсу қарқыны шамамен 4,5%-ды құрағанын атап өтті. 2025 жылы елге тікелей шетелдік инвестициялардың жалпы ағыны 14,4%-ға артып, 20,5 млрд АҚШ долларына жетті.
Министрдің орынбасары өңдеу өнеркәсібіне және қосылған құны жоғары өнім өндіруге инвестиция тартудың маңыздылығын атап өтті. Қазақстанда локомотивтерден бастап рельстерге дейінгі кең ауқымды өнім түрлері өндіріледі. Автомобиль зауыттары жылына 150 мыңнан астам көлік шығарады. Бұл ретте сала бастапқы деңгейдегі оқшаулаудан өндірістің толық циклі мен шағын торапты құрастыруға дейінгі даму кезеңінен өтті.
Кәсіпкерлік жөніндегі министрлік дөңгелек үстелінде Қазақстан тарапы инновациялық экожүйені және цифрлық инфрақұрылымды дамыту тәжірибесін таныстырды. Атап айтқанда, қуаттылығы 1 ГВт-қа дейін жетуі мүмкін Data Center Valley жобасы және мақсатты капиталы 1 млрд АҚШ долларын құрайтын Alem Capital Management қорлар қоры таныстырылды.
Форум аясында А. Зебешев инвестициялық ынтымақтастықты дамытуға және Қатармен бірлескен жобаларды ілгерілетуге бағытталған бірқатар екіжақты кездесулер өткізді.
Катардың Инвестицияларды тарту агенттігінің (Invest Qatar) Төрағасы шейх Али Әл-Уалид Әл Танимен кездесуде Қазақстан тарапы Ақтөбе облысында құны 1,5 млрд АҚШ долларын құрайтын мұнай өңдеу зауытын салу және Data Center Valley жобасын дамыту жөніндегі бастамаларды таныстырды.
Сондай-ақ Катардың ұлттық пошта операторы Qatar Post компаниясының төрағасы Хассан Джассим Ас-Сайедпен кездесу өтті. Кездесу барысында электрондық сауда, логистика және цифрлық қызметтер салаларындағы ынтымақтастық перспективалары талқыланды.
Roland Berger Middle East компаниясының серіктесі Ферас Фуад Абулмен кездесуде Қазақстандағы перспективалы жобаларды қаржылық және стратегиялық тұрғыдан пысықтау үшін халықаралық консалтингтік тәжірибені тарту мүмкіндіктері қарастырылды.
Қатар Мемлекеті Денсаулық сақтау министрінің кеңесшісі, профессор Махмуд Адилмен Қазақстанда денсаулық сақтау саласындағы ұлттық жасанды интеллект жүйесін құру жобасын іске асыру перспективалары талқыланды.
Форумға қатысу қорытындысы бойынша Қазақстан инвестициялар тарту, экономиканы әртараптандыру және инновациялық кәсіпкерлікті дамыту бағыттарында ЮНКТАД-пен және халықаралық әріптестермен одан әрі ынтымақтастық орнатуға дайын екенін растады.
