Астанада күрес түрлерінен әлем чемпионатының салтанатты ашылу рәсімі өтті. Іс-шараға Туризм және спорт министрі Ербол Мырзабосынов, Қазақстан күрес федерациясының президенті Еркін Оқасов және United World Wrestling ұйымының президенті Ненад Лалович қатысты, деп хабарлайды елорда әкімдігінің ресми сайты.
Салтанатты рәсім барысында министр Мемлекет басшысы Қасым-Жомарт Тоқаевтың әлем чемпионатына қатысушылар мен қонақтарға жолдаған құттықтау жеделхатын оқып берді.
«Күрес – күш-жігерді, ерік пен мінезді шыңдайтын олимпиадалық спорт түрі. Өзіндік дәстүрі мен терең тарихы бар бұл жекпе-жек өнерінің Қазақстан халқы үшін маңызы зор.
Сондықтан ұлттық мерекеміз – Республика күні тойланып жатқан шақта әлемнің үздік балуандары бас қосқан осындай беделді жарыстың Астанада өтуі еліміз үшін үлкен мәртебе», – делінген жеделхатта.
Күрес түрлерінен әлем чемпионаты Астанада 24 қазан мен 1 қараша аралығында өтеді. Жарыста 135 елден келген 900-ге жуық спортшы жарыс жолына шығады.
Әлем чемпионатының Астанада өтуі халықаралық спорт қауымдастығының Қазақстанға деген сенімін және еліміздің ең жоғары деңгейдегі жарыстарды өткізуге дайын екенін көрсетеді. Мұндай турнирлер халықаралық ынтымақтастықты нығайтуға, отандық күрес мектебін дамытуға және өскелең ұрпақ арасында спортты насихаттауға ықпал етеді.
Бұл чемпионат елімізде өтіп жатқан ірі халықаралық жарыстар легін жалғастырады. Мұндай жұмыстар Қазақстанның өңірдегі жетекші спорт орталықтарының бірі ретіндегі орнын нығайтуға және отандық спортшылардың мүмкіндіктерін кеңейтуге бағытталған.
