Қазақстан COP17-де биоәртүрлілікті сақтауға арналған цифрлық шешімдерді таныстырды

33,2 млн гектар немесе ел аумағының 12,2%-ы! Қазақстан 2035 жылға қарай ерекше қорғалатын табиғи аумақтардың көлемін осы көрсеткішке дейін ұлғайтуды жоспарлап отыр.

22 қазанда Ереванда өтіп жатқан COP17 конференциясы аясында ҚР Экология және табиғи ресурстар министрлігі Орман шаруашылығы және жануарлар дүниесі комитеті төрағасының орынбасары Андрей Ким UN Biodiversity Lab қатысуымен өткен халықаралық іс-шарада Қазақстанның кеңістіктік жоспарлау саласындағы тәжірибесін таныстырды.

Қандай жұмыстар атқарылды?

SPACES жобасы аясында Қазақстанның биоәртүрлілігін сақтаудың кеңістіктік жоспарының жобасы әзірленді.

Экологиялық байланыстар картасы жасалып, жаңа ерекше қорғалатын табиғи аумақтар мен экологиялық дәліздерді құруға қолайлы аумақтар айқындалды.

«Табиғат» ақпараттық жүйесі жер пайдалануды жоспарлау үшін кеңістіктік деректерге қол жеткізуге мүмкіндік береді.

Кеңістіктік технологияларды алдағы уақытта тұран жолбарысы мен Каспий итбалығын сақтау, жерлерді қалпына келтіру және жайылымдарды тұрақты басқару бағыттарында да қолдану жоспарланып отыр.

Андрей Ким экожүйелердегі өзгерістерді талдау және Куньмин-Монреаль биоәртүрлілік жөніндегі жаһандық негіздемелік бағдарламасының көрсеткіштерін есептеу бағытында UN Biodiversity Lab-пен ынтымақтастықтың маңызын атап өтті. Сондай-ақ ұлттық мамандарды аталған құралдарды жоспарлау, мониторинг жүргізу және есептілік дайындау барысында қолдануға үйретудің өзектілігіне тоқталды.