ЖАСАНДЫ ИНТЕЛЛЕКТ – ТҮРКІСТАН МЕКТЕПТЕРІНДЕГІ БІЛІМ БЕРУДІҢ ЖАҢА БАҒЫТЫ

Түркістан облысында білім беру үдерісіне заманауи технологияларды енгізу, цифрлық сауаттылықты арттыру және жасанды интеллект мүмкіндіктерін тиімді пайдалану бағытында жұмыстар жүргізілуде.
Бүгінде цифрландыру білім беру жүйесінің ажырамас бөлігіне айналып келеді. Дегенмен технологияны қолданудың негізгі мақсаты – тек электронды құралдарды көбейту емес, оқыту сапасын арттыру және әр баланың жеке қабілетіне қарай білім алуына мүмкіндік жасау.
Жасанды интеллект мұғалімнің орнын алмастырмайды. Керісінше, ол педагогтің жұмысын жеңілдетіп, қайталанатын міндеттерді азайтуға, оқушының біліміндегі олқылықтарды анықтауға, тапсырмаларды жеке бейімдеуге және кері байланысты жедел ұйымдастыруға көмектесуі тиіс.
Осы ретте оқушылардың ақпараттық және медиасауаттылығын дамытуға ерекше мән берілуде. Бала интернеттен алынған кез келген ақпаратты шындық ретінде қабылдамай, оның дереккөзін тексеруге, мәліметтерді салыстыруға, жалған ақпаратты ажыратуға және өз ойын дәлелдеуге үйренуі қажет.
Білім беру саласындағы цифрлық жаңғырудың маңызды бөлігі – мектептердің материалдық-техникалық базасын нығайту. «Қазақстан халқына» қорының қолдауымен облыста білім беру саласында жалпы құны 5 млрд 261 млн теңгені құрайтын бес ірі жоба жүзеге асырылған.
Жаңа оқу жылында қор 100 ауыл мектебін 300 заманауи физика, химия және биология кабинетімен жабдықтауға 5 млрд 114 млн теңге бағыттауда. Сонымен қатар 4 600 педагог пен 100 мектеп директорының біліктілігін арттыру және үш жылдық менторлық қолдау ұйымдастыру жоспарланған.
Жасанды интеллектіні білім беру жүйесіне енгізуде академиялық адалдық пен жеке деректерді қорғау талаптары да назардан тыс қалмауы тиіс. Оқушы дайын жауапты көшіруге емес, ақпаратты талдауға, дербес шешім қабылдауға және технологияны жауапкершілікпен пайдалануға дағдылануы қажет.
Басты мақсат – цифрлық мүмкіндіктерді сапалы білімге қол жеткізудің тиімді құралына айналдыру.