Түркістан қаласында Төтенше жағдайлар департаменті қызметкерлері мен қала тұрғындарының қатысуымен «Құтқарушылар аллеясының» салтанатты ашылуы өтті.
Департаменттің жеке құрамының күш-жігерінің арқасында мұнда көріктендіру жұмыстары жүргізіліп, батырларға естелік орны жасалып, ашылды.
Бұл аллея өз өмірлерін басқаларды құтқару үшін қатерге тігетін жандарға арналған қоғамдық кеңістіктің маңызды бөлігіне айналды.
Аллея – өз өмірлерін қиып, басқаларды құтқару жолында еңбек еткен құтқарушыларға деген құрмет пен алғыстың белгісі. Құтқарушыларды еске алып, өзгенің өмірі үшін қауіпті басынан кешіруге қорықпаған жандардың ерліктерін еске түсіруге мүмкіндік береді.
«Құтқарушылар аллеясы» құтқару қызметі қызметкерлерінің батылдығы мен жанкештілігін мойындау символы болып табылады. Олардың еңбегі қоғам үшін өте маңызды. Құтқарушылар күнделікті өртпен күресіп, табиғи апаттардың зардаптарын жоюмен айналысады, эвакуация мен алғашқы көмек көрсету міндеттерін орындайды.
Ал бұл Аллея – олардың жұмысының әр сәті қаншалықты маңызды және олардың ерліктері арқасында қанша адамның өмірі құтқарылғанын еске салатын орын.
Ашылу салтанатында құтқарушыларға алғыс сөздері айтылды. ТЖД басшылығы «Құтқарушылар аллеясы» қалалық инфрақұрылымның бір бөлігі ғана емес, қоғамға қызмет етуге өмірлерін арнаған адамдар туралы естеліктің мәңгі сақталатын жері екенін атап өтті.
Енді «Құтқарушылар аллеясы» Түркістан қаласының тұрғындары үшін рух күші, жанқиярлық пен құтқарушы мамандығына адалдықтың символына айналады.
