Қоршаған ортаны қорғау - үлкен жауапкершілік пен кәсібилікті талап ететін маңызды міндет. «Теңіз Жасағы» АҚ қызметінің маңызды бағыттарының бірі мұнайдың апаттық төгілуін жою және қоршаған ортаның ластануын азайтуға бағытталған жұмыстар. Бұл бағытта тәжірибелі мамандардың, арнайы жабдықтардың және командалық жұмыстың маңызы зор.
Сол мамандардың бірі Нұрсұлтан Саназаров. Ол ТЖМ «Теңіз Жасағы» АҚ компаниясында МАТЖ маманы болып жұмыс істейді және бұл салада 7 жылдық тәжірибесі бар. Нұрсұлтанның жұмысы мұнай төгілген жағдайда оның таралуын шектеуге, арнайы бондық қоршауларды орнатуға, мұнай өнімдерін жинауға және ластанудың қоршаған ортаға әсерін азайтуға бағытталған.
Мұндай жұмыстар жедел әрекет етуді, техникалық білімді, қауіпсіздік талаптарын қатаң сақтауды және команданың үйлесімді жұмысын талап етеді. Өйткені мұнай төгілуінің салдарын жою тек төгілген мұнайды жинау емес, табиғатты қорғау және экологиялық қауіпсіздікті қамтамасыз ету жолындағы маңызды жұмыс.
