Қоғамдық тамақтану объектілерінің қызметкерлері санитариялық-эпидемиологиялық талаптарды сақтауы тағам өнімдерінің қауіпсіздігін қамтамасыз етудің, тамақтан улану мен жұқпалы аурулардың алдын алудың маңызды шарты болып табылады.
Тағам өнімдерін дайындаумен, сақтаумен, тасымалдаумен және өткізумен айналысатын қызметкерлер жеке гигиена қағидаларын, санитариялық талаптарды және өндірістік процестерді ұйымдастырудың белгіленген тәртібін сақтауға міндетті.
Негізгі талаптардың бірі – жеке бас гигиенасын сақтау. Жұмыс басталар алдында, дәретханаға барғаннан кейін, ластанған заттармен, шикі етпен, балықпен және басқа да өнімдермен жанасқаннан кейін қызметкерлер қолдарын сабынмен мұқият жууы қажет. Тырнақтары қысқа алынған, шаштары бас киімнің астына жиналған болуы тиіс. Тағам дайындау кезінде таза арнайы киім мен аяқ киім қолданылуы қажет.
Жұқпалы аурулардың белгілері болған, сондай-ақ терісінде іріңді зақымданулар және тұтынушылардың денсаулығына қауіп төндіруі мүмкін басқа да жағдайлар анықталған кезде қызметкерлердің жұмысқа кірісуіне жол берілмейді. Өзін жайсыз сезінген жағдайда қызметкер бұл туралы объект басшысына уақтылы хабарлауы тиіс.
Міндетті медициналық қарап-тексерулерден өтуге ерекше мән беріледі. Қызметкерлер белгіленген тәртіппен медициналық қарап-тексерулерден өтіп, заңнамада көзделген қажетті медициналық құжаттарға ие болуы керек. Қызметкерлерді жұмысқа жіберу олардың денсаулық жағдайына қойылатын белгіленген талаптар сақталған кезде жүзеге асырылады.
Сонымен қатар қызметкерлер тағам дайындау технологиясын, тауарлық көршілестік қағидаларын, тағам өнімдерін сақтау температуралық режимдерін және жарамдылық мерзімдерін сақтауға міндетті. Дайын өнімдердің шикі өнімдермен жанасуына жол бермеу, таза мүкәммалды және жабдықтарды пайдалану, сондай-ақ жұмыс беттерін уақтылы тазалау қажет.
Қоғамдық тамақтану объектілерінің басшылары қызметкерлердің жеке бас гигиенасын сақтауына қажетті жағдайлар жасауға, оларды арнайы киіммен, жуу және дезинфекциялау құралдарымен қамтамасыз етуге, сондай-ақ персоналды санитариялық қағидаларға және тағам өнімдерімен қауіпсіз жұмыс істеу әдістеріне оқытуды ұйымдастыруға тиіс.
Қоғамдық тамақтану объектілерінің барлық қызметкерлерінің санитариялық-эпидемиологиялық талаптарды сақтауы тамақтан уланудың алдын алуға, халықтың денсаулығын сақтауға және көрсетілетін қызметтердің қауіпсіздігін арттыруға ықпал етеді.
Есте сақтаңыз: тағам қауіпсіздігі әрбір қызметкердің жеке жауапкершілігінен басталады!
