Оқиға орнынан роботтандырылған технологияларға дейін: ҚАЕУ студенттері тергеушілердің жұмысымен танысты
Шығыс Қазақстан облысы Полиция департаментінің қызметкерлері ҚАЕУ жоғары колледжінің «Құқықтану» мамандығында білім алатын студенттеріне практикалық сабақ өткізді. Болашақ заңгерлер тергеушілердің жұмысы қалай ұйымдастырылатынын, қылмыстарды тергеу кезінде қандай технологиялар қолданылатынын және заманауи әзірлемелердің полиция қызметіндегі рөлі туралы білді.
Тергеу басқармасының бастығы полиция полковнигі Мирхат Сагдолдаев пен оның орынбасары полиция майоры Қуандық Тресханов студенттерге қылмыстық істерді тергеудің ерекшеліктері, тергеу әрекеттерін жүргізу және дәлелдемелерді жинау тәртібі туралы айтып берді. Қызметтік тәжірибеден алынған мысалдар арқылы олар тергеушілердің күнделікті жұмыста қандай міндеттерге тап болатынын және оларды шешу үшін қандай білім қажет екенін түсіндірді.
Кездесудің ерекше қызығушылық тудырған бөлігі заманауи техникалық құралдардың таныстырылымы болды. Жедел-криминалистикалық басқармасы мен цифрландыру және жасанды интеллект басқармасының қызметкерлері криминалистика мүмкіндіктерімен таныстырып, роботтандырылған иттерді көрсетті. Студенттер жаңа технологиялардың полиция жұмысына қалай көмектесетінін және тәжірибеде қалай қолданылатынын көрді.
Кездесу барысында ішкі істер органдарындағы қызметтің шарттары да талқыланды. Студенттерге қызметке қабылдануға қойылатын талаптар, қызметке орналасу тәртібі және кәсіби өсу мүмкіндіктері түсіндірілді.
Мұндай практикалық сабақтар болашақ заңгерлерге мамандықтың қыр-сырын жақынырақ танып, теориялық білімнің нақты жағдайда қалай қолданылатынын көруге және құқық қорғау жүйесіндегі жұмыстың ерекшеліктерін тереңірек түсінуге мүмкіндік береді.
ШҚО ПД баспасөз қызметі
