Маңғыстау облысы әкімінің орынбасары Бекбол Орынбасаров «МАЭК» кәсіпорнының жұмыс барысымен танысты

Маңғыстау облысы әкімінің орынбасары Бекбол Орынбасаров «МАЭК» кәсіпорнындағы өндірістік жұмыстардың барысымен танысты. Жұмыс сапарына Ақтау қаласының әкімі, облыстық басқармалардың басшылары және «МАЭК» ЖШС-нің құрылымдық бөлімшелері мен департаменттерінің жетекшілері қатысты.

Кездесу барысында энергетикалық комбинаттың бас директоры Кеңес Орақов кәсіпорынның өндірістік құрылымы, негізгі қызмет бағыттары мен алдағы міндеттері туралы баяндады.

Жиында 2026–2027 жылдардағы жылыту маусымына дайындық, өндірістік нысандардағы жөндеу жұмыстары, энергетикалық жабдықтардың техникалық жағдайы, сумен жабдықтау және инфрақұрылымды жаңғырту мәселелері талқыланды. Сондай-ақ кәсіпорынның өндірістік қуатын дамыту перспективалары қарастырылды. Құрылымдық бөлімшелердің басшылары өздеріне қарасты нысандарда атқарылып жатқан жұмыстар туралы есеп берді.

Жұмыс сапары аясында Бекбол Орынбасаров кәсіпорынның өндірістік бөлімшелерін аралап, №2 су алу арнасын ұзарту және тереңдету жұмыстарының барысымен танысты.

-«МАЭК» ЖШС – Маңғыстау облысының тыныс-тіршілігін қамтамасыз етуде маңызды рөл атқаратын бірегей кәсіпорын. Өңірді қажетті ресурстармен тұрақты қамтамасыз ету халық, өнеркәсіптік кәсіпорындар мен әлеуметтік инфрақұрылым нысандары үшін аса маңызды, – деді Бекбол Орынбасаров.