2026 жылғы 19 қазаннан бастап ішкі сауда қағидаларына өзгерістер енгізіледі
Қағидаларға бақылау (сәйкестендіру) белгісі, материалдық жеткізгіш, сәйкестендіру коды, сәйкестендіру құралы, тауар санаты және тауар санатшасы ұғымдары қосылды.
Қайта сату мақсатында азық-түлік тауарларын сатып алу және өткізу Қазақстан Республикасының тиісті ұлттық стандарттарына сәйкес жүзеге асырылады. Ұлттық стандарттар болмаған жағдайда Қағидаларға қосымшада көрсетілген талаптар қолданылады.
Сатушы сатылатын тауарларға тауардың атауы, сорты, салмағы немесе бірлігі үшін бағасы көрсетілген баға белгілерінің болуын қамтамасыз етеді.
1, 2, 3 және 4-санаттағы сауда объектілерінде тауар сататын ішкі сауда субъектілері:
- Қазақстанда өндірілген тауарлар қойылған орындарды «Қазақстанда жасалған» деген арнайы маңдайшамен немесе жазумен белгілейді. Бұл жазуды қатар орналасқан бірнеше отандық тауарға ортақ пайдалануға болады.
- «Қазақстанда жасалған» деген жазуы бар отандық тауарларды кросс-мерчандайзинг әдісін қолдана отырып, сұранысы жоғары өнімдердің жанына орналастырады.
- Қазақстанда өндірілген азық-түлік және азық-түлікке жатпайтын тауарларға сауда алаңының және (немесе) сөре кеңістігінің кемінде 30%-ын бөледі:
- әрбір тауар санатшасы бойынша — осы санатшаға бөлінген сауда алаңының немесе сөре кеңістігінің кемінде 30%-ын;
- әрбір тауар санаты бойынша — осы санатқа бөлінген сауда алаңының немесе сөре кеңістігінің кемінде 30%-ын;
- бүкіл сауда объектісі бойынша — азық-түлік және азық-түлікке жатпайтын тауарларға бөлінген сауда алаңының немесе сөре кеңістігінің кемінде 30%-ын.
- Қазақстанда өндірілген тауарларды әрбір тауар санаты мен санатшасының сөре кеңістігінің орталық бөлігіне, тұтынушыларға көз деңгейінде көрінетін және қолжетімді жерлерге, сұранысы жоғары өнімдермен қатар орналастырады.
Ішкі сауда субъектілері әлеуметтік маңызы бар азық-түлік тауарларына сауда үстемесін өндірушінің сату бағасынан немесе көтерме жеткізушінің жеткізу шарттарында көрсетілген сатып алу бағасынан 15%-дан асырмай белгілейді.
Әлеуметтік маңызы бар тауарларды тасымалдауға және (немесе) импорттауға байланысты нақты жұмсалған әрі құжатпен расталған шығындар сомасына, сондай-ақ электрондық сауда кезіндегі жеткізу қызметтеріне және бөлшек саудадағы азық-түлік тауарларының табиғи кему нормалары шегіндегі шығындарға сауда үстемесін ұлғайтуға жол беріледі.
