⚖️ «ЗАҢ ЖӘНЕ ТӘРТІП»: ЖАСТАРДЫҢ ҚҰҚЫҚТЫҚ САУАТТЫЛЫҒЫН АРТТЫРУ

«Заң және тәртіп» қағидатын іске асыру аясында 05.10.2026 жылы Алматы облысы Әділет департаментінің қызметкерлері Сүлейман Демирел атындағы университетінің студенттеріне арналған дәріс өткізді.

Іс-шара барысында студенттерге мемлекеттік қызметке кіру тәртібі, оның ішінде мемлекеттік қызметке қойылатын негізгі талаптар, конкурсқа қатысу тәртібі, сондай-ақ еңбек заңнамасының негізгі нормалары, жұмыскерлер мен жұмыс берушілердің құқықтары мен міндеттері түсіндірілді.

Сонымен қатар, нотариаттық және адвокаттық қызметпен айналысуға үміткер тұлғаларды аттестаттаудан өткізу тәртібіне ерекше назар аударылды. Студенттерге кандидаттарға қойылатын талаптар, қажетті құжаттарды ұсыну және аттестаттаудан өту тәртібі бойынша түсіндірмелер берілді.

Кездесу барысында Қазақстан Республикасының «Мемлекеттік қызмет туралы», «Нотариат туралы», «Адвокаттық қызмет және білікті заң көмегі туралы» заңдарының, сондай-ақ Қазақстан Республикасының Еңбек кодексінің қолданыстағы нормалары негізінде құқықтық түсіндіру жұмыстары жүргізілді.

Мұндай іс-шаралар жастардың құқықтық сауаттылығын арттыруға, заңды құрметтеу мәдениетін қалыптастыруға және студенттерді заң саласындағы кәсіби қызметтің бағыттарымен таныстыруға бағытталған.