Қарттар күніне арналған айлық аясында 3 қазан күні Айыртау ауданының тұрғындарына арнайы барып, жағдайларымен танысу ұйымдастырылды.
Аудан әкімі Мейрам Мендыбаев әлеуметтік мәселелер жөніндегі орынбасары Ерлан Қазбеков және әлеуметтік қорғау бөлімінің басшысы Оксана Брюханова бірге қарт тұрғындардың үйлеріне барып, оларды жеке құттықтап, құрмет пен алғыстарын білдірді.
Бұл күні Светлана Жұмабекқызы Мурзагулова, Татьяна Александровна Середенко, Любовь Николаевна Хамазина және Сәуле Теміртасқызы Қожакова жылы лебізге бөленді. Олардың әрқайсысының артында адал еңбек жылдары, түрлі оқиғаларға толы өмір жолы, отбасы мен жақындарына деген қамқорлығы бар. Бүгінде олар құрметті демалыста болғанымен, аудан тарихы мен отбасылық дәстүрлердің маңызды бөлігі болып қала береді.
Мұндай кездесулер — жай ғана көңіл бөлу емес, аға буын өкілдеріне жылы сөздер айтып, олардың жағдайын біліп, зор денсаулық, отбасылық амандық және ұзақ ғұмыр тілеуге мүмкіндік беретін игі дәстүр.
Өз кезегінде, әйелдер қонақтарға көрсеткен көңілдері, қамқорлығы мен жылы қарым-қатынасы үшін шын жүректен алғыстарын білдірді.
