Ақмола облысында құтқарушылар Халықаралық қарттар күніне орай азаматтық қорғау жүйесінің ардагерлерін құттықтап, олардың көп жылғы еңбегі мен қызметті дамытуға қосқан үлесіне ризашылық білдірді.
Халықаралық қарттар күні қарсаңында Ақмола облысы Төтенше жағдайлар департаментінің қызметкерлері азаматтық қорғау жүйесінің ардагерлеріне арнайы барып, ізгі тілектерін жеткізді. Бұл кездесу ардагерлер үшін бұрынғы әріптестерімен қайта қауышып, бүгінгі құтқарушылар буынының ықыласы мен құрметін сезінуге мүмкіндік берді.
Қонақтарға гүл шоқтары, жеміс-жидектер мен түрлі тәттілер табысталып, зор денсаулық, амандық, отбасылық жылулық және ұзақ ғұмыр тілектері айтылды. Кездесу барысында ТЖД қызметкерлері ардагерлерге көп жылғы еңбегі, кәсібилігі және қызметке деген адалдығы үшін алғыс білдірді.
Ардагерлердің көпшілігі өмірінің ондаған жылын азаматтық қорғау жүйесіне арнаған. Олардың мол тәжірибесі мен кәсіби білімі қызмет тарихының маңызды бөлігіне айналып, ұрпақтар сабақтастығының берік негізін қалады.
Мерекелік іс-шаралар аясында ақмолалық құтқарушылар облыстағы медициналық-әлеуметтік мекемелердің бірінің аумағында сенбілік өткізді. ТЖД қызметкерлері аумақты абаттандыру жұмыстарына қатысып, мекеме аумағында жайлы жағдай қалыптастыруға өз үлестерін қосты.
Мұндай іс-шаралар тек практикалық көмек көрсетіп қана қоймай, ұрпақтар сабақтастығын нығайтуға, азаматтардың қауіпсіздігін қамтамасыз ету жолында ұзақ жылдар бойы еңбек еткен жандарға деген құрметті арттыруға мүмкіндік береді.
