ДЗЮДО: ӘДІЛЕТ АЛМАТ КҮМІС ЖҮЛДЕГЕР АТАНДЫ

Жапонияның Аичи халықаралық аренасында өтіп жатқан дзюдодан ХХ жазғы Азия ойындарында Қазақстан қоржыны кезекті жүлдемен толықты.

Ерлер арасындағы -81 кг салмақтың финалында отандасымыз, биылғы Азия чемпионы Әділет Алмат пен жарыс қожайыны Сотаро Фудживара күш сынасты. Бас жүлде жолындағы тартысты белдесуде әлем чемпионатының күміс жүлдегері жапон палуаны басым түсті. Осылайша, 22 жастағы Әділет Қазақстан қоржынына күміс медаль салды.

Айта кетейік, бұл отандасымыз қатысып жатқан алғашқы Азиада. Бүгін Әділет 1/8 айналымда Тегин Алмазжан уулын (Қырғызстан), ширек финалда Шинбайар Ойинчимегті (Моңғолия) жықты. Ал жартылай финалда Абубәкір Шеровтан (Тәжікстан) мықты екенін дәлелдеді.

Бұл Аичи-Нагоядағы ойындарда дзюдодан Қазақстан қоржынына түскен 4-медаль.