QS Insights Magazine журналында жарияланған «Kazakhstan’s Higher Education: Building Central Asia’s Leading Academic Ecosystem» атты жаңа мақалада Қазақстанның жоғары білім беру жүйесінің негізгі жетістіктері мен оның халықаралық деңгейдегі беделінің артып келе жатқаны атап өтілді.
QS World University Rankings 2027 рейтингіне Қазақстанның 18 жоғары оқу орны енді. Бұл – Орталық Азияның қалған барлық елдерінің көрсеткішінен жоғары. Осылайша, Қазақстан Азиядағы жоғары білім беру жүйелері ең көп ұсынылған 11 елдің қатарына кірді.
QS Asia University Rankings 2026 рейтингіне Қазақстанның 44 университеті, ал QS World University Rankings by Subject 2026 пәндік рейтингіне 13 жоғары оқу орны енді. Бұл білім беру сапасы мен ғылыми зерттеулер деңгейінің тұрақты өсіп келе жатқанын көрсетеді.
QS Sustainability Rankings 2026 рейтингіне Қазақстанның 23 университеті енгізілді. Ал 2023 жылы еліміздің бірде-бір жоғары оқу орны бұл рейтингте болмаған еді.
Қазақстан жоғары білімнің интернационалдануын жүйелі түрде дамытып келеді: университеттер шетелдік оқытушылар мен студенттерді көбірек тартып, халықаралық серіктестікті кеңейтіп, ағылшын тіліндегі білім беру бағдарламаларының санын арттырып келеді.
QS Best Student Cities 2027 рейтингінде Алматы мен Астана әлемнің үздік студенттік қалалары қатарынан көрінді. Алматы 78-орынды, Астана 119-орынды иеленді. Сонымен қатар елорда оқу мен өмір сүру құнының қолжетімділігі бойынша әлемдегі ең қолжетімді студенттік 10 қаланың қатарына енді. Мақала авторлары Қазақстанның жетістіктері жоғары білім сапасын арттыруға, ғылымды дамытуға, академиялық ұтқырлықты және халықаралық ынтымақтастықты кеңейтуге бағытталған жүйелі мемлекеттік саясаттың нәтижесі екенін атап өтеді. Келесі кезеңнің басты міндеттері – ғылыми-зерттеу әлеуетін күшейту, шетелдік студенттердің географиясын кеңейту және білімге негізделген экономика үшін бәсекеге қабілетті кадрлар даярлау.
Толығырақ – QS Insights Magazine журналындағы мақалада