"Балқаш қаласы әкімінің аппараты" ММ

Жеке тұрғын үй құрылысы үшін жер учаскелерін беру су және электрмен жабдықтау желілерімен қамтамасыз етілген алаңдарда ғана рұқсат етіледі. Орталықтандырылған сумен жабдықтау жүйесі жоқ елді мекендерде мұндай жер учаскелерін беру тек электрмен жабдықтау желілері болған жағдайда ғана рұқсат етіледі. Жеке тұрғын үй құрылысы үшін жер учаскесін сұрау кезінде азаматтардың өтініштері (өтінішхаттары) арнайы есепке алынады және жер телімдерін бөлуге арналған алаңдар дайындалуына қарай немесе жеке тұрғын үй құрылысына пайдаланылатын бос аумақтар болған жағдайда қанағаттандырылады. Азаматтарға жеке тұрғын үй құрылысы үшін жер учаскелерін беру қағидаларын орталық уәкілетті орган бекітеді. Жеке тұрғын үй құрылысы үшін жер учаскелері тегін негізде берілген кезде, азаматтың мемлекет тарапынан жеке тұрғын үй құрылысына бұрын жер учаскесі берілген-берілмегені ескеріледі. Арнайы есепке қою кезінде азаматтың мемлекет тарапынан жеке тұрғын үй құрылысы үшін берілген жер учаскесінің бар-жоғы ескеріледі, бұл туралы мәліметтер Мемлекеттік корпорациядан сұралады. Республикалық маңызы бар қаланың, астананың, ауданның, облыстық маңызы бар қаланың жергілікті атқарушы органдары, сондай-ақ кенттердің, ауылдардың, ауылдық округтердің әкімдері жер учаскелерін бөлуге арналған алаңдарды дайындау туралы және жеке тұрғын үй құрылысы үшін жер учаскесін алу кезегінің тізімдері туралы ақпараттың қолжетімді болуын қамтамасыз етуге міндетті. Бұл ақпарат арнайы ақпараттық стендтерде орналастыру және (немесе) бұқаралық ақпарат құралдарында қазақ және орыс тілдерінде тоқсанына кемінде бір рет жариялау арқылы жүзеге асырылады. Қазақстан Республикасы азаматтарына жеке тұрғын үй құрылысы үшін жер учаскелерін олардың өтініштерін арнайы есепке қоймай беруіне тыйым салынады.

4-тарау, 29-тармақ. Ағаштарды жасарту және қалың өскен ағаштарды сирету жұмыстары вегетация кезеңі басталғанға дейін немесе кеш күзде жүргізіледі.

Қазақстан Республикасының Әлеуметтік кодексінің 128-бабына сәйкес, атаулы әлеуметтік көмек тағайындаудан бас тарту негіздері мыналар болып табылады: облыстарда, республикалық маңызы бар қалаларда және астанада белгіленген кедейлік шегінен отбасының жан басына шаққандағы орташа табысының асып кетуі; өтініш берушінің учаскелік комиссияның материалдық жағдайды тексеру жүргізуінен бас тартуы; тұлғаның (отбасының) материалдық жағдайын тексеру нәтижелері бойынша дайындалған учаскелік комиссияның мұқтаждықтың жоқтығы туралы қорытындысы; осы Кодекстің 122-бабының 4-тармағында көрсетілген тұлғаларды қоспағанда, отбасының еңбекке қабілетті мүшесінің жұмыспен қамтуға жәрдемдесу шараларына қатысудан бас тартуы – бас тартқан күннен бастап алты ай ішінде; бұрын жасалған әлеуметтік келісімшартты бұзу және (немесе) әлеуметтік келісімшартта көзделген міндеттемелерді алушының кінәсінен орындамау – атаулы әлеуметтік көмекті қайта тағайындауға жүгінудің алдындағы алты ай ішінде; атаулы әлеуметтік көмекті тағайындау үшін көрінеу жалған мәліметтерді және (немесе) шындыққа сәйкес келмейтін құжаттарды ұсыну – олар ұсынылған күннен бастап алты ай ішінде.

Ағымдағы жылдың 24 мамырынан бастап Қазақстан Республикасының «Тұрғын үй қатынастары туралы» Заңына өзгерістер енгізіліп, күшіне енді. Осы өзгерістерге сәйкес тұрғын үй жағдайларын жақсартуға бағытталған мемлекеттік қолдау шараларын ұсыну туралы шешім, соның ішінде коммуналдық тұрғын үй қорынан тұрғын үй беру немесе жергілікті атқарушы орган жеке тұрғын үй қорынан жалға алған тұрғын үйді беру туралы шешім ұлттық даму институты мәртебесіне ие тұрғын үй құрылыс жинақ банкімен тұрғын үй жағдайларын жақсартуға бағытталған мемлекеттік қолдау шараларын іске асыру қағидаларына сәйкес қабылданады (Қазақстан Республикасы «Тұрғын үй қатынастары туралы» Заңының 74-бабы). Жоғарыда баяндалғанның негізінде, тұрғын үйге мұқтаж ретінде кезекте тұрған азаматтар арасында тұрғын үйді бөлу жөніндегі оператор ретінде қазіргі уақытта «Отбасы Банк» АҚ (бұдан әрі – Банк) айқындалды. Осылайша, жергілікті атқарушы органның балансында бар және (немесе) пайдалануға берілген пәтерлер тізімі Банкке ұсынылғаннан кейін, мемлекеттік тұрғын үйлерді кезекте тұрған азаматтар арасында бөлу Банк арқылы жүзеге асырылатын болады.

Қазақстан Республикасының «Тұрғын үй қатынастары туралы» Заңының 2-бабының 14) тармақшасына сәйкес, кондоминиум объектісінің ортақ мүлкіне (қасбеттер, шатырлар, кіреберістер, вестибюльдер, холлдар, дәліздер, баспалдақ марштары мен алаңдары, лифтілер, шатыр асты, техникалық қабаттар, жертөлелер, үйдің ортақ инженерлік жүйелері мен жабдықтары, абоненттік пошта жәшіктері, көппәтерлі тұрғын үй орналасқан жер учаскесі және (немесе) үй маңындағы жер учаскесі, абаттандыру элементтері және ортақ пайдаланудағы өзге де мүлік) пәтерлер мен тұрғын емес үй-жайлардың меншік иелеріне ортақ үлестік меншік құқығында тиесілі. Аталған Заңның 34-бабының 3-тармағына сәйкес, пәтердің, тұрғын емес үй-жайдың, автотұрақ орнының немесе қойманың меншік иесі өзіне тиесілі мүлікті күтіп-ұстау міндетін көтереді, сондай-ақ кондоминиум объектісінің ортақ мүлкін күтіп-ұстауға байланысты шығындарға қатысуға міндетті.

Қазіргі уақытта жолдардың жағдайы көптеген сұрақтар туғызып отырғанын түсінеміз. Шұңқырлардың пайда болуы өткен жылғы жылу және сумен жабдықтау құбырларын ауыстыру жұмыстарына байланысты. Бұл жұмыстар күз айының соңында, жер қатқан кезде аяқталғандықтан, қазір, көктемде, топырақ шөгіп, асфальттың бұзылуына әкеліп соқтыруда. Биыл қаланың 18 көшесін жөндеуді жоспарлап отырмыз. Жөнделетін учаскелердің жалпы ұзындығы 17,6 шақырымды құрайды. Қазіргі уақытта, негізгі жөндеу жұмыстарына мердігерді таңдау жүріп жатқанда, біз уақытша жұмыстар жүргізудеміз: шұңқырларды жөндеу жолдарды тегістеу бұзылған учаскелерге қосымша материал төсеу.Бұл шаралар уақытша, бірақ олар орташа жөндеу басталғанға дейін жолдарды қауіпсіз етуге көмектеседі. Қолайсыздық үшін кешірім сұраймыз және уақытша қиындықтарға түсіністікпен қарауыңызды сұраймыз. Барлық жұмыстар аяқталғаннан кейін бізде жаңа жолдар ғана емес, сенімді коммуникациялар да болады.