2026 жылғы 28 қазанда Балқаш қаласының аумақтық сайлау комиссиясының облыстық және қалалық мәслихаттар депутаттығына кандидаттар ұсыну қорытындылары бойынша отырысы өтті.
Сайлауды дайындау мен өткізудің негізгі іс-шараларының күнтізбелік жоспарына сәйкес, мәслихат депутаттығына кандидаттарды ұсыну мерзімі 2026 жылғы 14 қазанда басталып, 27 қазанда сағат 18:00-де аяқталды.
Мәслихат депутаттығына кандидаттарға қойылатын талаптар:
Мәслихат депутаты болып сайлану үшін азамат жиырма жасқа толған болуы, Қазақстан Республикасы Конституциясының 35-бабының 2 және 3-тармақтарына сәйкес сайлау құқығына ие болуы және Қазақстан Республикасы Конституциясының 88-бабының 3-тармағында белгіленген талаптарға сәйкес келуі тиіс.
Қазақстан Республикасының азаматы тек бір мәслихаттың депутаты бола алады.
Мәслихат депутаттығына кандидат болып мынадай азаматтар тіркеле алмайды:
1.Заңда белгіленген тәртіппен өтелмеген немесе алынбаған соттылығы бар азаматтар;
2.Сыбайлас жемқорлық қылмысын немесе сыбайлас жемқорлық құқық бұзушылығын жасағаны үшін кінәсі сот тәртібімен танылған азаматтар;
3.Сот әрекетке қабілетсіз деп таныған азаматтар.
Сайлау заңнамасына сәйкес, сайлау процесінің барлық кезеңі сайлау комиссиялары арқылы жүзеге асырылады.
Қазіргі уақытта Балқаш қаласында 14 сайлау комиссиясы жұмыс істейді. Оның ішінде 1 аумақтық және 13 округтік сайлау комиссиясы бар.
Сайлау науқаны барысында 13 сайлау округі бойынша барлығы 43 кандидат ұсынылды. Оның ішінде 3 кандидат облыстық мәслихат депутаттығына, 40 кандидат қалалық мәслихат депутаттығына ұсынылды.
Саяси партиялар тарапынан 19 кандидат ұсынылды:
·«Әділет» партиясы – 13 кандидат;
·«Қазақстанның Халық партиясы» – 1 кандидат;
·«Қазақстанның «Ақ жол» демократиялық партиясы» – 2 кандидат;
·«Respublica» партиясы – 3 кандидат.
Өзін-өзі ұсыну тәртібімен 24 кандидат ұсынылды.
Ұсынылған кандидаттардың 31-і – ер адам, 12-сі – әйел адам.
Қазақстан Республикасының саяси партияларының мүшелері – 32 кандидат, партияда жоқ кандидаттар саны – 11.
Ең жасы үлкен кандидат – 54 жаста, ең жасы кіші кандидат – 25 жаста. Ұсынылған кандидаттар арасында бес ұлттың өкілдері бар.
41 кандидаттың жоғары білімі бар.
Кандидаттарды ұсыну кезеңінің аяқталуы сайлау науқанының келесі кезеңі – кандидаттарды тіркеуге өтуін білдіреді. Кандидаттарды тіркеу 2026 жылғы 1 қарашада сағат 18:00-ге дейін жалғасады.
Сайлау алдындағы үгіт жұмыстары 2026 жылғы 1 қарашада сағат 18:00-де басталып, 28 қарашада сағат 00:00-де аяқталады.
