Баланың үнін есту, қатердің алдын алу: Семей қаласының ювеналды полиция инспекторымен бірге өткен бір күн

ДП области Абай:

🖼 👮🏻‍♂️ Баланың үнін есту, қатердің алдын алу: Семей қаласының ювеналды полиция инспекторымен бірге өткен бір күн

Ол 21 жаста, күні кеше ғана өзі де мектеп партасында отырған еді. Бүгінде полиция лейтенанты Жұлдыз Қалиқанова мектепке кәмелетке толмағандар істері жөніндегі инспектор ретінде оралды. Оның басты міндеті — балаларға өз әрекеттерінің салдарын түсінуге, қауіпті дер кезінде тануға және қиын сәтте кімнен көмек сұрауға болатынын білуге жәрдемдесу.

Жұлдыз Қуатқызының ішкі істер органдарында қызмет етіп жүргеніне бір жыл болды. Ол — Семей қаласы Полиция басқармасы қоғамдық қауіпсіздік бөлімінің ювеналды полиция тобының кәмелетке толмағандар істері жөніндегі учаскелік инспекторы.

«Орталық» учаскесіне қызмет көрсетеді, оған №37 гимназия мен №4 мектеп бекітілген.
Жұмыс күні сағат 08:30-да қалалық Полиция басқармасында басталады.

Одан әрі — мектептерге бару, педагогтермен кездесу, оқушылармен және ата-аналармен әңгімелесу. Кездесу тақырыптарын өмірдің өзі айқындайды: буллинг пен кибербуллинг, ұсақ бұзақылық, вандализм және құқық бұзушылықтардың салдары.

«Заң мен Тәртіп» идеологиясын ілгерілету аясында инспектор оқушыларға жауапкершіліктің күнделікті шешімдерден басталатынын түсіндіреді: ортақ чатқа не жазу керек, біреуге жасалған қысымға қалай жауап қату қажет, достардың қауіпті ұсынысына келісуге бола ма? Заңдық ұғымдардың астарында балалар өздеріне түсінікті өмірлік жағдайлар мен олардың салдарын көре білуі маңызды.

Қызметтің тағы бір маңызды бөлігі — профилактикалық есепте тұрған кәмелетке толмағандар мен олардың отбасыларын аралау. Бұл жерде басты назар баланың тұрмыс жағдайына, ересектермен қарым-қатынасына және қауіпсіздік мәселелеріне аударылады. Мұндай жұмыс үлкен әдептілікті талап етеді, өйткені әр үйдің табалдырығының ар жағында өзіндік отбасылық тағдыр жатыр.

Ата-аналармен кездесу де Жұлдыздың күнделікті міндеттеріне кіреді. Отбасы, мектеп және полиция өзара тығыз байланыста болып, алаңдатарлық өзгерістерді уақытылы байқаса, құқық бұзушылықтың алдын алу және балаларды қорғау әлдеқайда жеңіл болады.

Түнгі профилактикалық рейдтер өтетін күндері қызмет кешкі уақытта да жалғасады. Нұсқаулықтан кейін инспектор әріптестерімен бірге ойын-сауық орындарын, дәмханаларды және кәмелетке толмағандар жүруі мүмкін басқа да жерлерді тексереді.

Мұндай іс-шаралар сағат 22:00-ден 03:00-ге дейін өтеді.

Мектеп дәлізі, ата-аналармен әңгіме, отбасыларды аралау, түнгі рейд — ювеналды инспектордың жұмысы осындай көптеген кездесулерден құралады. Ал олардың әрқайсысы мәселені дер кезінде байқауға, баланың жанын түсінуге және жағдай ушығып кетпей тұрып көмек көрсетуге мүмкіндік береді.