Алматы қаласында қауіпті өндірістік объектідегі өнеркәсіптік қауіпсіздік талаптарының сақталуы тексерілуде
Алматы қаласы Төтенше жағдайлар департаменті Өнеркәсіптік қауіпсіздік басқармасының инспекторлары ҚР ТЖМ «Резерв» ШЖҚ РМК-ның «Комета» филиалында жоспарлы тексеру жүргізуде.
Тексеру барысында мамандар қауіпті өндірістік объектіні пайдалану кезінде белгіленген өнеркәсіптік қауіпсіздік талаптарының сақталуын бағалайды.
Тексеру іс-шараларымен қатар жаңадан қабылданған инспекторларды кәсіпорынның жұмыс ерекшеліктерімен практикалық тұрғыда таныстыру жұмыстары ұйымдастырылды. Оларға технологиялық процестердің ерекшеліктері, өнеркәсіптік қауіпсіздік талаптары, сондай-ақ жабдықтарды пайдалану кезінде туындауы мүмкін ықтимал тәуекелдер түсіндіріледі.
Әсіресе технологиялық процесте аммиак қолданылатын компрессорлық цехқа ерекше назар аударылды. Инспекторлар жабдықтарды пайдалану ерекшеліктерімен танысып, ықтимал авариялық жағдайлар туындаған кезде объектінің әрекет етуге дайындығын бағалайды.
Кәсіпорында өзінің кәсіби өртке қарсы қызметі жұмыс істейді. Сонымен қатар шарт негізінде кәсіби авариялық-құтқару қызметі тартылған. Оның қызметкерлері тәулік бойы кезекшілік атқарып, жедел әрекет етуге дайындықты қамтамасыз етеді.
Жоспарлы тексеру объектідегі өнеркәсіптік қауіпсіздіктің жай-күйін бағалауға, ықтимал кемшіліктерді анықтауға, сондай-ақ жаңадан қабылданған инспекторлардың практикалық білімін бекітуге мүмкіндік береді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
