10 қараша – Қазақстан Республикасы ішкі істер органдары ардагерлерінің күні. Бұл – саналы ғұмырын ел тыныштығын сақтауға, қоғамдық тәртіпті қамтамасыз етуге және азаматтардың қауіпсіздігін қорғауға арнаған ардақты жандарға құрмет көрсететін ерекше күн.
Ішкі істер органдарының тарихында адал еңбегімен, кәсіби шеберлігімен және жауапкершілігімен өшпес із қалдырған ардагерлер аз емес. Солардың бірі – құқық қорғау саласында 32 жыл абыройлы қызмет атқарған полиция қызметкері Жәнібек Шарипов.
Жәнібек Батауұлы еңбек жолын 1992 жылы Қарағанды қаласы Ішкі істер басқармасы жанындағы патрульдік-бекеттік қызметтің полицейі болып бастады. Жылдар бойы жинақтаған тәжірибесі мен ұйымдастырушылық қабілетінің арқасында қызметтік баспалдақтан өтіп, бірқатар жауапты басшылық лауазымдарды атқарды.
Атап айтқанда, Атырау қаласындағы патрульдік полиция және әкімшілік полиция бөлімдерін, сондай-ақ қоғамдық қауіпсіздік басқармасын басқарды. Әр қызметінде заңдылық пен тәртіпті басты ұстаным етіп, жеке құрамның кәсіби даярлығын арттыруға, қоғамдық қауіпсіздікті нығайтуға және құқық бұзушылықтардың алдын алуға күш салды.
2016 жылдан бастап Атырау облысы полиция департаментінің жылдам қимылдайтын арнайы жасағының командирі қызметін атқарды. Бұл лауазым жоғары кәсіби даярлықты, темірдей тәртіпті, батылдық пен үлкен жауапкершілікті талап етеді. Жәнібек Батауұлы жеке құрамға жетекшілік ете отырып, қызметтік міндеттердің сапалы орындалуына және қызметкерлердің жауынгерлік даярлығын жоғары деңгейде ұстауға ерекше мән берді.
Оның көпжылдық қызмет жолы – табандылықтың, Отан алдындағы борышқа адалдықтың және офицерлік абыройдың айқын көрінісі.
32 жылдық қызмет өтілі – жай ғана еңбек жылдарының жиынтығы емес. Бұл – ел тыныштығы жолында атқарылған қажырлы еңбек, жауапты шешімдер мен сан түрлі қызметтік міндеттер, сондай-ақ кейінгі буынға қалдырылған мол тәжірибе мен өнеге.
Бүгінде ішкі істер органдарының ардагерлері жас полицейлер үшін кәсібилік пен адалдықтың үлгісі болып отыр. Олардың өмірлік тәжірибесі, қызметтік дәстүрлері мен ақыл-кеңестері жас буынның бойында жауапкершілік, отансүйгіштік және қызметтік антқа адалдық қасиеттерін қалыптастыруда маңызды рөл атқарады.
Ішкі істер органдарының ардагері атану – жылдар бойғы адал еңбектің, халық сенімі мен абыройлы қызметтің айғағы.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
