Қараусыз қалған малды іздеуге полиция жұмылуда: Қарағанды облысында 322 бас мал табылды. Қарағанды облысында жыл басынан бері полицейлер жоғалған 322 бас малды тауып, иелеріне қайтарды. Алайда малдың жоғалуының бәрі бірдей ұрлыққа байланысты емес. Кей жағдайда төрт түліктің қараусыз қалуы мен иелерінің салғырттығы да осындай жағдайларға себеп болып отыр. Жыл басынан бері полицияға мал ұрлығы бойынша 80 арыз түскен. Жүргізілген іздестіру шаралары барысында 53 жағдайда жоғалған малдың орналасқан жері анықталды. Нәтижесінде барлығы 322 бас мал табылды. Сонымен қатар полицейлер мал ұрлығының 15 дерегін ашып, ұрланған 86 бас малды иелеріне қайтарды. Қылмыс жасады деген күдікпен 11 адам ұсталып, алты қылмыстық топтың заңсыз әрекетіне тосқауыл қойылды. Мал ұрлығының алдын алу және оның жолын кесу мақсатында полиция мал тасымалына бақылауды күшейтті. 2026 жылғы 25 қыркүйектен бастап облыстық және республикалық маңызы бар автожолдарда 19 жылжымалы блокбекет жұмыс істеп тұр. Онда полицейлер мал тасымалдайтын көліктерді тексеріп, тасымалдың заңдылығы мен қажетті құжаттардың болуына ерекше назар аударады. Бұл шараның тиімділігі бұған дейін де дәлелденген. Өткен жылы жылжымалы блокбекеттердің көмегімен Ақмола облысының аумағында ұрланған 40 бас жылқыны айдап әкету дерегі ашылды. Қарағанды облысы Полиция департаменті бастығының орынбасары Жасқайрат Қайыров малдың жоғалуына кейде иелерінің өздері де себеп болатынын атап өтті. «Ауыл тұрғындары үшін мал – жай ғана мүлік емес, күнделікті еңбектің жемісі әрі отбасының негізгі табыс көзі. Сондықтан мал жоғалғаны туралы әрбір хабарламаға жедел ден қойып, іздестіру жұмыстарын жүргіземіз. Мал болуы мүмкін аумақтарды тексеріп, оның ықтимал қозғалыс бағыттарын анықтаймыз. Дегенмен кейбір мал иелері төрт түлігін қараусыз қалдырып, жайылымға бақташысыз жібереді. Малдың қайда жүргенін бақыламайды. Соның салдарынан жануарлар жоғалып, оларды іздеуге полиция қызметкерлері жұмылдырылады. Бұл қосымша уақыт пен күшті талап етеді. Ал сол ресурстарды басқа қылмыстарды ашуға және қоғамдық қауіпсіздікті қамтамасыз етуге бағыттауға болар еді. Сондықтан мал иелерін өз шаруашылығына жауапкершілікпен қарауға шақырамыз. Төрт түлікті қараусыз қалдырмай, жайылымды ұйымдастыру, бақташының бақылауын қамтамасыз ету және мал ұсталатын орындарды қадағалау қажет. Күдікті жағдайлар байқалса, полицияға дер кезінде хабарлаған жөн. Малдың амандығы – ең алдымен, иесінің жауапкершілігі», – деді Жасқайрат Қайыров. Полиция департаменті мал ұрлығының алдын алу жұмыстары тұрақты түрде жалғасатынын еске салады. Сонымен қатар тұрғындарды малды қараусыз қалдырмауға, жайылым мен қорадағы қауіпсіздікке мән беруге шақырады. Өйткені қарапайым сақтық шаралары малдың жоғалуының алдын алып қана қоймай, полицияның басқа да маңызды міндеттеріне күш жұмылдыруына мүмкіндік береді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
