Астанада дәстүрлі «Соғым-FEST» ет жәрмеңкесі басталды. Жәрмеңке қаланың үш жерінде ұйымдастырылып, еліміздің әр өңірінен келген шаруалар ет өнімдерін көпшілікке тиімді бағамен ұсынып жатыр, деп хабарлайды елорда әкімдігінің ресми сайты.
Жәрмеңкені қалалық Сауда және тұтынушылардың құқықтарын қорғау департаменті мен Инвестициялар және кәсіпкерлікті дамыту басқармасы ұйымдастырды.
«Соғым – халқымыздың қысқа қамдануымен байланысты қалыптасқан көне дәстүр. Ежелден әр отбасы қысқа арнап ет дайындап, оны сүрлеп сақтаған. Сондай-ақ жақындарын жинап, дастарқан басында ет бөліскен. Бүгінде «Соғым-FEST» осы дәстүрді жаңаша форматта жалғастырып, отандық фермерлер мен елорда тұрғындарын бір алаңға жинап отыр.
Жәрмеңке арқылы тұрғындар ет өнімдерін тиімді бағамен сатып ала алады», – деді қалалық Инвестициялар және кәсіпкерлікті дамыту басқармасы басшысының орынбасары Мақсат Жанабаев.
Жәрмеңкеде ет өнімдерін тиімді бағамен сатып алуға болады. Мәселен, сиыр етінің бір келісі – 3 300 теңге, жылқы еті – 3 500 теңгеден, қой еті 3 700 теңгеден сатылып жатыр.
Елордада Қарағанды, Ақмола, Павлодар және Абай облыстарынан келген фермерлер өз өнімдерін ұсынып отыр.
«Жәрмеңкеге еліміздің оңтүстік өңірлерінен де шаруалар келді. Өткен жылдардағы көрсеткіштерге қарағанда, мұнда апта сайын орта есеппен 150-200 тонна ет сатылады.
Ұйымдастырушылар маусым аяқталғанша сатылатын ет көлемі 1 000 тоннадан асады деп жоспарлап отыр», – деп толықтырды Мақсат Жанабаев.
Сатылымға шығарылған еттің бәрі зертханалық тексеруден өтіп, қауіпсіздік талаптарына сәйкестігі анықталады.
Ал бағаның негізсіз өспеуін қалалық Сауда және тұтынушылардың құқықтарын қорғау департаментінің мамандары бақылайды. Ет әлеуметтік маңызы бар азық-түлік тауарларына жатады. Сол себепті оның сауда үстемесі 15 пайыздан аспауы тиіс.
«Біздің негізгі міндетіміз – бағаның дұрыс белгіленуін қадағалау. Мұндай жәрмеңкелер өндірушілердің өнімін тұтынушыға делдалсыз жеткізуге мүмкіндік береді.
Қызметкерлеріміз сауда орындарын түгелімер аралап, өнім бағасының 15 пайыздық үстемеден аспауын бақылап отырады», – деді Астана қаласының Сауда және тұтынушылардың құқықтарын қорғау департаментінің басшысы Еркебұлан Тағашов.
«Соғым-FEST» ет жәрмеңкесі 2026 жылдың соңына дейін әр демалыс күндері сағат 09:00-ден 19:00-ге дейін елорданың үш сауда алаңында өтеді:
Keruen Joly сауда орталығы – Алаш тасжолы, 35Б;
«Ет Әлемі» сауда орталығы – Алаш тасжолы, 31/1;
Jurt сауда орталығы – Бейбарыс Сұлтан көшесі, 3.
Keruen Joly және «Ет Әлемі» сауда орталықтарына №7, 11, 39, 41, 45, 53, 59, 76, 81, 82, 120, 120А, 307 және 317 автобустарымен жетуге болады. Ал Jurt сауда орталығына №2, 7, 13, 32, 42, 49, 50, 67 және 73 автобустары қатынайды.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
