Алматы қаласының қазандық нысанында төтенше жағдайлардың алдын алу және өндірістік қауіпсіздікті қамтамасыз ету бағытында маңызды оқу-жаттығу шарасы ұйымдастырылды. Шара Алматы қаласы Төтенше жағдайлар департаменті Өнеркәсіптік қауіпсіздік басқармасы инспекторларының қатысуымен, қазандықта орын алуы ықтимал жарылыс пен өрт сценарийі бойынша өткізілді. Бұл оқу дабылы төтенше жағдай туындаған сәтте персоналдың іс-қимыл алгоритмін практикалық тұрғыда пысықтауды, жедел кезекші қызметтердің ден қою дағдыларын жетілдіруді және қауіпті өндірістік нысанда өнеркәсіптік қауіпсіздік талаптарының қатаң сақталуын қамтамасыз етуді көздейді.
Жаттығу барысында қазандық персоналы авариялық ошақты жылдам оқшаулау, технологиялық процесті қауіпсіз тоқтату және ықтимал салдардың алдын алу бағытында кәсіби іс-қимылдарды жан-жақты жүзеге асырды. Сонымен қатар қызметкерлердің төтенше жағдайдағы өзара үйлесімді іс-қимылы, ақпарат тарату жүйесінің жылдамдығы және эвакуациялау шараларының тиімділігі сыналды. Өз кезегінде Өнеркәсіптік қауіпсіздік басқармасының инспекторлары өндірістік объектілерде белгіленген қауіпсіздік регламенттерін бұлжытпай орындаудың, сондай-ақ жабдықтарға техникалық куәландыру мен профилактикалық жөндеу жұмыстарын уақтылы жүргізудің ерекше маңыздылығына назар аударды.
Мұндай жүйелі түрде ұйымдастырылатын практикалық оқу-жаттығулар персоналдың төтенше жағдайларға әзірлік деңгейін арттыруға, өндірістік тәуекелдер мен апаттық жағдайларды барынша азайтуға, сондай-ақ жұмыскерлердің өмірі мен денсаулығын қорғауға тікелей ықпал етеді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
