29 қазанда мамандандырылған күзет қызметінің полицейлері кәсіби мерекесін атап өтеді. Ішкі істер органдарының бұл бөлімшесіне биыл 74 жыл толып отыр. Солтүстік Қазақстан облысында қызметтің қалыптасуына милицияның отставкадағы капитаны Шауали Болатұлы Рахмалиновтың қосқан үлесі зор. Бүгінде қызметтің ең қарт ардагері 90-ға толды.
Шауали Болатұлы әскердегі қызметін өтеп, колхозда жұмыс істегеннен кейін, 1968 жылы милиция қатарына қабылданды. Еңбек жолын Соколов ауданындағы Петропавл кеңшарында учаскелік уәкіл болып бастады. Келесі жылдан бастап бұл лауазым учаскелік инспектор деп атала бастады.
«Алғашқы жыл ең қиын кезең болды, – деп еске алады Шауали Болатұлы. «Ауылдағы учаскелік инспектор халық үшін биліктің негізгі өкілі еді. Қазір кәмелетке толмағандар істері жөніндегі полиция, отбасылық-тұрмыстық зорлық-зомбылыққа қарсы күрес бөлімшелері, көші-қон қызметі бар. Ал ол кезде ауылдық учаскелік инспектор мектеп оқушыларымен кездесіп, бұзақыларды тәртіпке шақыратын, әйелдер кеңесімен және халық жасақтарымен жұмыс істейтін, өрт қауіпсіздігіне де жауап беретін. Мұның бәрі оның міндеттерінің бір бөлігі ғана еді».
Ол кезде ұрлық ең көп таралған қылмыс түрлерінің қатарында еді. Азаматтардың мүлкін қорғау басты міндеттердің бірі болды. Қызметінің алғашқы жылында-ақ Шауали Болатұлы асыл тұқымды айғырларды ұрлау оқиғасын тергеді. Жас милиционер ұрланған жылқылардың бірін ұры жасырып қойған үйдің жертөлесінен тапты.
Шауали Болатұлы учаскелік инспектор болып тоғыз жылға жуық қызмет атқарды. 1977 жылы Преснов аудандық атқару комитетінің ішкі істер бөліміндегі ведомстводан тыс күзет бөлімшесінің бастығы болып тағайындалды. Бұл бөлімшенің қызметкерлері дүкендерді, қоймаларды, жинақ кассаларын, әкімшілік ғимараттар мен басқа да нысандарды күзетті.
Шауали Рахмалинов 1993 жылы отставкаға шыққанға дейін осы қызметте болды. Ішкі істер органдарындағы еңбек өтілі 25 жылды құрайды. Зейнетке шыққаннан кейін де ол түрлі іс-шараларға белсене қатысып, жас қызметкерлерге тәлімгер болды.
«Мен өмірден түйген басты сабақтарымды жастарға жеткізуге тырыстым. Ең алдымен, бұл – тәртіп, еңбекке деген көзқарас және бір рет қабылдаған антқа адалдық. Қызметте қателікке бой алдырған полицей тек өз мансабына зиян келтіріп қоймайды, адал қызмет етіп жүрген әріптестерінің де атына кір келтіреді», – дейді ардагер.
Тек былтыр, 89 жасында, Шауали Болатұлы қызметтік және қоғамдық белсенділігін біржола тоқтатуға бел буды. Солтүстік Қазақстан облысының мамандандырылған күзет қызметі басқармасының қызметкерлері үшін ол әлі де борышына адалдықтың, белсенді өмірлік ұстанымның үлгісі, қызметтің аңызы әрі жас буынға тәлім берудің жарқын өнегесі болып қала береді.
