Алматы қаласының Алатау ауданында Қазақстан гимнастика федерациясының орталығын салу жобасы мемлекеттік сараптаманың оң қорытындысына ие болды.
Мамандандырылған спорт кешенін қаланың №13 шағын ауданындағы 3/1 учаскеде салу жоспарланған. Тапсырыс берушісі – Алматы қаласының Құрылыс басқармасы, бас жобалаушы – «Қазақ энергетика және байланыс ғылыми-зерттеу жобалау институты» ЖШС.
Жобаға сәйкес орталықта спорттық және көркем гимнастика, батуттық гимнастика және спорттық аэробика, спорттық акробатикамен айналысуға арналған залдар, сондай-ақ жарыс өткізуге арналған әмбебап зал қарастырылған. Бұдан басқа хореография және балалар гимнастикасына арналған залдар, медициналық-оңалту орталығы, әкімшілік үй-жайлар мен жатақхана салу көзделген.
Жоба құжаттамасына сәйкес, кешен негізгі, жас және жасөспірім санатындағы 670-тен астам спортшыны даярлауға арналған.
Жобаны жүзеге асыру әртүрлі жас санатындағы гимнастардың кәсіби даярлығын жетілдіруге, спорттық жарыстар өткізуге және Алматы қаласында гимнастика саласын одан әрі дамытуға мүмкіндік береді.
