Қызылжар ауданында әлеуметтік қорғау жүйесі қызметкерлерінің кәсіби мерекесіне арналған салтанатты іс-шара өтті. Мерекелік жиынға әлеуметтік сала мамандары, сала ардагерлері мен құрметті қонақтар қатысты.
Аудан әкімінің орынбасары Азат Ибраев жиналған қауымды кәсіби мерекемен құттықтады. Ол күн сайын жалғызбасты қарттарға, мүгедектігі бар адамдарға, ерекше білім беру қажеттіліктері бар балаларға және өмірлік қиын жағдайға тап болған отбасыларға қолдау көрсететін әлеуметтік қызметкерлердің еңбегін атап өтті.
Қызылжар ауданында 80-нен астам әлеуметтік қызметкер 390 азаматқа арнаулы әлеуметтік қызмет көрсетеді. 2026 жылы халықты қолдауға және әлеуметтік қорғау шараларын жүзеге асыруға 836 миллион теңгеден астам қаражат қарастырылған. Жұмыспен қамтуға жәрдемдесу де маңызды бағыттардың бірі болып қала береді. Биылғы 10 айда 1 700-ден астам адам жұмысқа орналастырылды.
Іс-шара аясында марапаттау рәсімі өтті. Кәсібилігімен, жауапкершілігімен және өз ісіне адалдығымен ерекшеленген мамандарға алғыс хаттар мен құрмет грамоталары табысталды. Көп жыл бойы халыққа қызмет етіп, әлеуметтік саланың дамуына үлес қосқан ардагерлерге де ерекше алғыс білдірілді. Мерекелік бағдарлама құттықтаулармен, сыйлықтар табыстаумен және концерттік нөмірлермен жалғасты.
