Батыс Қазақстан облысында «Заң мен тәртіп» нарративі аясында Экономикалық тергеп-тексеру департаментінің қызметкерлері Белсенді ұзақ өмір сүру орталығының зейнеткерлерімен кездесу өткізді. Іс-шараның негізгі тақырыбы азаматтарды интернет-алаяқтықтан қорғау мәселелері болды.
Кездесу барысында қатысушыларға интернеттегі алаяқтықтың кең таралған түрлері және оларды анықтау жолдары туралы ақпарат берілді.
Қызметкерлер сондай-ақ жасанды интеллект көмегімен жасалған жалған бейне және аудиожазбаларды – дипфейктерді – шынайы материалдардан ажырату жолдарын айтып берді. Қатысушыларға әлеуметтік желілердегі құпиялылық ережелерін сақтау және интернетте бейтаныс адамдармен қарым-қатынас жасағанда сақ болу қажеттігі ескертілді.
Бұдан бөлек, күмәнді қоңыраулар мен хабарламалар түскен жағдайда қандай әрекет жасау керектігі түсіндіріліп, азаматтардың келісімінсіз несие рәсімдеуді шектеуге мүмкіндік беретін «Стоп-кредит» қызметінің жұмысы таныстырылды.
