Өскемен қаласының №9 өрт сөндіру бөлімінің бастығы Ғамзат Бекбосынов өз мамандығын жүрек қалауымен таңдаған. Оның жұбайы Фарида да ТЖ жүйесінде – Өскемен қаласының №4 өрт сөндіру бөлімінің радиотелефоншысы болып қызмет атқарады.
Мұндай отбасында ерлі-зайыптылар бір-бірінің мазасыздығын, жұмыстағы кідірістерді және түнгі кезекшіліктің не екенін жақсы түсінеді.
Ғамзат 15 жылдан астам уақыт бойы азаматтардың қауіпсіздігін қамтамасыз ету жолында қызмет етіп келеді. Ол көптеген төтенше жағдайлар мен өрттерді жоюға қатысты.
«Өртенген пәтердегі өртті сөндіру кезінде болған Назарбаев даңғылындағы өрт есімде. Мен және менің қарауылым тұрғындарды қатты түтін басқан кіреберістен құтқара алдық», – дейді Ғамзат.
Фарида да қызметте жүргеніне аз уақыт болған жоқ. Тәжірибелі радиотелефоншы ретінде ол өртті сөндіру кезінде маңызды рөл атқарады.
«Мен ТЖМ жүйесінде 10 жылдан астам уақыт қызмет етіп келемін. Менің тәжірибемдегі ең ірі өрттердің бірі – арматура зауытындағы өрт. Менің жұмыс күнім телефон қоңырауларына жауап берумен ғана шектелмейді. Бұл – үлкен шиеленіс пен жауапкершілікті талап ететін жұмыс. 30–40 секунд ішінде диспетчер дүрбелеңге түскен адамды тыныштандырып, нақты мекенжайын біліп, не жанып жатқанын анықтап, өрттің дәрежесін бағалап, қанша өрт сөндіру автоцистернасын жіберу керектігін және қосымша күш қажет пе екенін бірден шешуі керек», – деді Фарида.
Бексбосыновтар отбасында екі бала бар. Ерлі-зайыптылардың кезекшілік кестелері сирек сәйкес келеді. Сондықтан бірге өткізетін демалыс пен отбасылық мерекелер олар үшін нағыз сыйлыққа айналады.
Қызметтік борыш пен жеке өмір тоғысқан мұндай отбасылық одақта ерлі-зайыптылар секундтың қадірін білетін тамаша командаға айналады. Басты артықшылығы – абсолютті өзара түсіністік. Алайда бірлескен қызметтің өзіндік қиындықтары да бар. Олардың ішіндегі ең қиыны – бір-бірі үшін үнемі алаңдау.
Барлық қиындықтарға қарамастан, ТЖМ жүйесінде бірге қызмет етіп жүрген ерлі-зайыптылар ведомствоның берік іргетасы болып табылады. Тәжірибе мен қызметке деген адалдық мұндай отбасыларда ұрпақтан-ұрпаққа беріліп, көбінесе жаңа әулеттердің қалыптасуына жол ашады.
