Бүгінгі таңда еліміздің мұнай өңдеу саласы үш ірі тоннажды және технологиялық мұнай өңдеу зауыттарымен ұсынылған:
- Атырау МӨЗ – қайта өңдеу қуаты жылына 5,5 млн тонна;
- Павлодар МХЗ – жылына 5,5 млн тонна;
- Шымкент МӨЗ – жылына 6 млн тонна.
Ақтау қаласында жылына 1,5 млн тоннаға дейін Қаражанбас мұнайын өңдейтін «CaspiBitum» БК» ЖШС жұмыс істейді.
Осылайша, Қазақстанның жиынтық өңдеу қуаттылығы жылына 18,5 млн тонна мұнайды құрайды, бұл ішкі нарықтың жанар-жағармай материалдарына (ЖЖМ) ағымдағы қажеттіліктерін толығымен дерлік жабуға мүмкіндік береді.
Ішкі нарықты тұрақтандырудың арқасында соңғы 5 жылда алғаш рет қазақстандық МӨЗ-де өндірілген К4 экологиялық класты АИ-92 маркалы 40 мың тоннаға дейін жоғары сапалы автобензиннің экспорты жүзеге асырылды.
Сонымен қатар, Энергетика министрлігі ел экономикасын одан әрі дамыту қолданыстағы қайта өңдеу қуаттарын кеңейтуді, сондай-ақ қуаттылығы жылына 10 млн.тоннаға дейін жаңа ірі тоннажды мұнай өңдеу зауытын салуды талап ететінін атап өтті.
Мәселен, мұнай өңдеу көлемін кеңейту жобалары бойынша жылына 18,5 млн. тоннадан 28,2 млн. тоннаға дейін ұлғайту ұзақ мерзімді мақсаттар болып табылады:
Шымкент мұнай өңдеу зауыты – жылына 6 млн. тоннадан 12 млн. тоннаға дейін;
Павлодар МХЗ – 2 кезеңде мұнай жылына 5,5 млн. тоннадан 8 млн. тоннаға дейін;
Атырау МӨЗ – жылына 0,7 – 1,2 млн.тонна немесе шикізат бойынша жылына 5,5 млн. тоннадан 6,7 млн. тоннаға дейін.
Шымкент және Павлодар МӨЗ жобалары қазіргі заманғы отын-мұнай-химия конфигурациясы және өнім желісін кеңейту контекстінде қарастырылады: К5+ деңгейіндегі мотор отындары және базалық мұнай-химия өнімдері.
