Қазақстан Республикасының заңнамасына сәйкес, нетто-тұтынушы — бұл өзіне тиесілі немесе өзге заттық құқық негізінде иеленген шағын қуатты объект арқылы электр және (немесе) жылу энергиясын толық немесе ішінара өз қажеттілігіне пайдаланып, артық энергияны электр желісіне беретін жеке немесе заңды тұлға. Мұндай объект тарату электр желісіне қосылған және тұтыну мен беру көлемін бөлек есептейтін жүйемен жабдықталуы тиіс. Бұл объектілерге жаңартылатын энергия көздерін пайдаланатын қондырғылар жатады.
Заңнамада сондай-ақ шағын қуатты жаңартылатын энергия көздері объектісі деген ұғым бар. Бұл — жаңартылатын энергия көздері арқылы электр және (немесе) жылу энергиясын өндіруге арналған, жалпы орнатылған қуаты 200 киловаттқа дейін (қоса алғанда) болатын техникалық құрылғылар мен олардың жұмысын қамтамасыз ететін инфрақұрылым.
Мемлекет тарапынан шағын қуатты жаңартылатын энергия көздері технологияларын халық арасында дамыту үшін келесі қолдау шаралары көзделген:
- Нетто-тұтынушылар өндірілген артық электр энергиясын тұтынушылар тобына қарамастан, біріңғай шекті бағамен энергиямен жабдықтаушы ұйымға сата алады;
- Нетто-тұтынушылар электр энергиясын беру үшін төлем төлеуден босатылады, бұл жаңартылатын энергия көздері технологияларын енгізуді жеңілдетеді;
- Энергиямен жабдықтаушы ұйым артық электр энергиясын сатып алуға міндетті, сондай-ақ энергия таратушы ұйымдар нетто-тұтынушыларды желіге қосуға міндетті. Бұл нормалар нетто-тұтынушылар мен энергия таратушы ұйымдар арасындағы өзара іс-қимылды оңайлатады және рәсімдерді бірыңғайландырады.
