Жаңартылатын энергия көздері (ЖЭК) объектісін салу кезінде энергия жинақтау жүйесін орнату қажет пе?
Электр энергиясын жинақтау жүйесін орнату барлық жаңартылатын энергия көздері (ЖЭК) объектілері үшін міндетті емес, ол тиісті аукциондық сауда-саттық түрінің талаптары мен заңнамада белгіленген жағдайларда міндетті болып табылады.
«ЖЭК пайдалануды қолдау туралы» ҚР Заңының 1-бабы 1-1) тармақшасына сәйкес аукциондық сауда-саттық электр энергиясын жинақтау жүйелерімен жабдықталған жаңа ЖЭК объектілерін салу жобаларын іріктеу үшін де өткізілуі мүмкін.
Бұл ретте Аукциондық сауда-саттықты ұйымдастыру және өткізу қағидаларының 28-тармағында еркін аукциондық сауда-саттықтар үшін арнайы талап белгіленген: жел және күн электр станциялары электр энергиясын сақтау жүйелерімен жабдықталуға тиіс. Жел электр станциялары үшін жүйенің қуаты объектінің белгіленген қуатының кемінде 30 пайызын құрауға, ал сыйымдылығы қуатты кемінде 2 сағат бойы беруді қамтамасыз етуге тиіс. Күн электр станциялары үшін жүйенің қуаты да белгіленген қуаттың кемінде 30 пайызын құрауға, ал сыйымдылығы қуатты кемінде 4 сағат бойы беруді қамтамасыз етуге тиіс. Сақтау жүйесін пайдалану мерзімі электр энергиясын сатып алу шартының қолданылу мерзіміне сәйкес болуы керек.