Мемлекет басшысының бастамасымен қолға алынған «Таза Қазақстан» экологиялық акциясы бүгінде ел өміріндегі маңызды бастамалардың біріне айналды. Бұл — қоршаған ортаны таза ұстауға бағытталған ортақ жауапкершілік пен күнделікті мәдениетті қалыптастыратын игі іс.
Сенбі күні акция аясында Жалағаш кенті мен барлық ауылдық округтерде кең көлемде сенбілік жұмыстары ұйымдастырылды. Тазалық жұмыстары барысында көшелер мен тротуарлар, қоғамдық орындар мен аяқсу арналары қоқыстан тазартылып, ағаштар әктелді. Сонымен қатар орындықтар мен қоршаулар, ғимараттардың қасбеттері сырланып, жол белгілері мен жол сызықтары жаңартылды. Аудан әкімі Ардақ Ибраимов жауапты мекемелерге санитарлық тазалықты тұрақты бақылауда ұстау және қоқысты уақытылы шығару жөнінде нақты тапсырмалар берді.
