2026 жылғы 31 шілде мен 1 тамыз аралығында Алматы қаласының аумағында «Қауіпсіз үй» республикалық жедел-профилактикалық іс-шарасы өтеді. Бұл туралы Алматы қаласы Алмалы аудандық полиция басқармасы хабарлады.
Іс-шараның негізгі мақсаты – отбасылық-тұрмыстық қатынастар саласындағы құқық бұзушылықтардың алдын алу, тұрмыстық зорлық-зомбылықтың жолын кесу, азаматтардың құқықтары мен заңды мүдделерін қорғау, сондай-ақ тұрғын үй секторындағы қауіпсіздік деңгейін арттыру.
Іс-шара аясында полиция қызметкерлері отбасылық-тұрмыстық зорлық-зомбылық фактілерін анықтауға және жолын кесуге, зардап шеккендерге уақтылы көмек көрсетуге, сондай-ақ халықтың құқықтық сауаттылығын арттыруға бағытталған кешенді профилактикалық жұмыстар жүргізеді.
Алматы қаласы Алмалы аудандық полиция басқармасы қала тұрғындарын отбасылық-тұрмыстық зорлық-зомбылық фактілеріне бейжай қарамауға шақырады. Егер құқыққа қайшы әрекеттер туралы қандай да бір ақпарат белгілі болса, бұл жөнінде дереу 102 немесе 111 нөмірлеріне хабарлау қажет.
