Кешкі және түнгі уақытта қоғамдық тәртіпті нығайту мен қылмыстың алдын алу мақсатында Маңғыстау облысы Түпқараған ауданының полициясы қызметтің күшейтілген форматына көшті. Ақшұқыр және Сайын Шапағатов елді мекендерінің аумағында полицияның кешенді күштерінің кешкі саптық жиыны (гарнизондық таралым) өтті.
Жеке құрамның жиыны Түпқараған ауданының полиция бөлімі бастығының қызмет жөніндегі орынбасары, полиция полковнигі Н. Сапаровтың төрағалығымен ұйымдастырылды.
Ауқымды саптық жиынның негізгі мақсаты – азаматтардың қауіпсіздігін қамтамасыз етуге күш пен құралдардың дайындығын тексеру, сондай-ақ жасақтарды бағыттар бойынша жедел бөлу. Шара барысында полковник Н. Сапаров қызметкерлердің сыртқы келбетін, қызметтік куәліктерінің болуын, арнайы құрал-жабдықтардың, байланыс құралдарының және қызметтік автокөліктердің жарамдылығын жеке тексерді. Әрбір патрульдік жасаққа нақты жаяу және автокөлік маршруттары бекітілді.
Нұсқаулық кезінде полиция полковнигі Н. Сапаров кешкі уақытта көшедегі құқық бұзушылықтардың орын алу қаупі артатынын баса айтты. Осыған байланысты жеке құрамға адамдар көп жиналатын орындарда, тұрғын үйлердің аулалары мен демалыс аймақтарында бақылауды барынша күшейту тапсырылды.
Қызметке кірісер алдында қызметкерлерге мынадай нақты міндеттер қойылды:
- Күмәнді тұлғаларды уақытылы анықтау және азаматтардан түскен кез келген сигналға жедел әрекет ету;
- Ішкі істер органдарының профилактикалық есебінде тұрған тұлғаларды тұрғылықты мекенжайы бойынша тексеру;
- Ұсақ бұзақылық, қоғамдық орындарда ішімдік ішу және тыныштықты бұзу фактілерінің жолын кесу.
Тікелей нұсқаулық соңында басшылық заңдылықты, қызметтік тәртіпті қатаң сақтау және азаматтармен сыпайы, мәдениетті қарым-қатынас жасау қажеттігін ерекше атап өтті. Бұйрық берілгеннен кейін тәртіп сақшылары өздеріне сеніп тапсырылған аумақтарды патрульдеуге аттанды.
Маңғыстау облысы Полиция департаментінің Баспасөз қызметі
