Байтиков Бахтияр Бауыржанұлы - азаматтық қорғау майоры, Жітіқара ауданы, Жітіқара қаласындағы № 12 өрт сөндіру бөлімінің бастығының орынбасары.
Оның азаматтық қорғау жүйесіндегі кәсіби жолы 2012 жылы Қазақстан Республикасы Төтенше жағдайлар министрлігінің Көкшетау техникалық институтына оқуға түсуінен басталды. Дәл осы оқу ордасында ол кейіннен өмірінің ажырамас бөлігіне айналған өрт-құтқару спорт түрімен алғаш танысты.
Оқуды қарқынды жаттығулармен қатар алып жүру оңай болған жоқ. Алайда табандылығының, тәртібінің және алғашқы тәлімгері - КСРО-ның өрт-қолданбалы спорты бойынша алғашқы спорт шеберлерінің бірі Василий Матвеевич Косаревтің қолдауының арқасында ол елеулі нәтижелерге қол жеткізді.
2017 жылы институтты тәмамдағаннан кейін ол оқу орнында өрт-құтқару спорты бойынша жаттықтырушы болып қалу туралы ұсынысты қабылдап, азаматтық қорғау саласының болашақ мамандарын даярлауға өзін арнады.
2017 жылдан 2023 жылға дейін оның жетекшілігімен халықаралық дәрежедегі бір спорт шебері, Қазақстан Республикасының бес спорт шебері және спорт шеберлігіне кандидат оннан астам спортшы даярланды. Оның шәкірттері бірнеше рет ел чемпиондары атанды.
Футболдан да айтарлықтай жетістіктерге қол жеткізілді. Оның жетекшілігімен ТЖМ курсанттарынан құралған команда Қазақстан Республикасы Ішкі істер министрлігінің жоғары оқу орындары арасында өткен жарыстар тарихында алғаш рет бірінші орынға ие болды. Сонымен қатар курсанттар алғаш рет ЛЛФ футзалдан әуесқойлар лигасының чемпионы атанды. Бүгінде жеңіп алынған кубоктар Мәлік Ғабдуллин атындағы Азаматтық қорғау академиясының мұражайында сақтаулы.
Ол үшін туған оқу орнының тарихында өз ізін қалдыру және чемпиондардың жаңа буынын тәрбиелеу - ерекше мақтаныш.
Өміріндегі басты қағидалар ретінде ол тәртіпті, жауапкершілікті және айналасындағыларға деген құрметті санайды.
«Тәртіп пен өз іс-әрекетіңе деген жауапкершілік - жеңістің негізі», - деп атап өтеді ол.
Оның өмірінде отбасы маңызды орын алады. Азаматтық қорғау саласында қызмет ететін жұбайы қызметтің ерекшелігін түсінеді және әрдайым қолдау көрсетеді. Сонымен қатар ол жоғары нәтижелерге қол жеткізуде басшылықтың сенімі мен ұжымның ауызбіршілігін де маңызды деп санайды.
Жас ұрпаққа үндеуінде ол мамандық таңдауға саналы түрде қарап, қиындықтардан қорықпауға шақырады.
«Біздің мамандығымыз - абыройлы, бірақ өте ауыр. Бұл жолдан кез келген адам өте алмайды. Ең бастысы - өз ісіңді жақсы көру, жұмысыңа бар күшіңді арнау. Сонда еңбегің міндетті түрде жемісін береді», - дейді ол.
Оның тарихы - мамандыққа деген сүйіспеншілік, табандылық және өз қағидаларына адалдық адамның жеке биіктерге жетуіне ғана емес, болашақ чемпиондарды тәрбиелеуіне де мүмкіндік беретінінің жарқын үлгісі.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.









