Жасөспірімнің мінез-құлқындағы алаңдатарлық өзгерістерді қалай байқауға болады? Радикалды ықпалдың белгілері анықталса, қандай әрекет жасау қажет? Оқушымен және оның ата-анасымен сенімді диалогты қалай құруға болады? Осы сұрақтардың жауаптары елорда педагогтеріне арналған арнайы оқу бағдарламасында қарастырылды.
Астанада кәмелетке толмағандардың радикалды діни ортаға тартылуының алғашқы белгілерін анықтау және психологиялық-педагогикалық сүйемелдеу әдістері бойынша төрт күндік курстар ұйымдастырылды.
Бағдарлама теориялық сабақтар мен практикалық дайындықты біріктірді. Теология, дінтану және психология саласының мамандары экстремизм мен терроризмнің алдын алу, интернеттегі радикалды идеологияға қарсы тұру, ата-аналармен өзара іс-қимыл және жасөспірімдермен жеке жұмыс жүргізу мәселелерін қарастырды.
Практикалық жағдайларды талдауға, психологиялық тренингтерге және білім беру ортасындағы қауіп факторларын анықтау әдістеріне ерекше назар аударылды.
Қатысушылар қарастырылған мәселелерге жоғары қызығушылық танытып, талқылаулар мен практикалық тапсырмаларға белсенді араласты және кәсіби тәжірибе алмасты.
Оқу сапасы мен оның практикалық маңызын бағалау үшін ұйымдастырушылар тыңдаушылар арасында анонимді сауалнама жүргізді. Курстар аяқталған соң педагогтерге сертификаттар табысталды.
Жыл басынан бері осындай сегіз курс өткізіліп, барлығы 165 адам қамтылды.
Алынған білім педагогтерге профилактикалық тәсілдерді күнделікті жұмыста қолдануға, туындайтын қауіптерге дер кезінде назар аударуға және оқушылармен әрі олардың ата-аналарымен тиімді өзара іс-қимыл орнатуға көмектеседі.
Материал Астана қаласы ТҚК аппаратының ақпараты негізінде дайындалды
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
