2026 жылғы 3–5 қараша аралығында Астанада ҚР мемлекеттік шекарасы арқылы өткізу пункттерінде қоғамдық денсаулық сақтау саласындағы төтенше жағдайларға дайындықты қамтамасыз ету мәселелері бойынша тренерлерге арналған оқыту семинары өтті.
Іс-шараны ДДСҰ Қазақстандағы елдік офисі Комитеттің қолдауымен ұйымдастырды. Оқытуға шаммен 40 маман, Комитеттің, Ұлттық қоғамдық денсаулық сақтау орталығының өкілдері, Халықаралық медициналық-санитариялық қағидалар (ХМСП) бойынша ұлттық үйлестірушілер, сондай-ақ өткізу пункттерінің қызметкерлері қатысты.
Қатысушылар санитариялық-эпидемиологиялық қауіпсіздікті қамтамасыз ету тетіктерін, күнделікті жұмысты ұйымдастыру және қоғамдық денсаулық сақтау саласындағы төтенше жағдайларға тиімді ден қою мәселелерін қарастырды.
Іс-шараның ашылуында Комитет төрағасы орынбасарының міндетін атқарушы Айгүл Катренова құттықтау сөз сөйлеп, мемлекеттік шекарада жұмыс істейтін мамандардың әлеуетін арттырудың маңыздылығына тоқталды. «Ел аумағын санитариялық қорғау және өткізу пункттерінде санитариялық-эпидемияға қарсы іс-шараларды жүргізу – халықтың санитариялық-эпидемиологиялық саламаттылығын қамтамасыз етудің басым бағыттары. Мемлекеттік шекарада қызмет атқаратын мамандардың кәсіби әлеуетін арттыру ел қауіпсіздігін қамтамасыз етуде ерекше маңызға ие», – деп атап өтті Айгүл Катренова.
Оның айтуынша, Қазақстанның мемлекеттік шекарасы бойында теміржол, әуе және су көлігі объектілеріне бақылау жүргізетін 26 санитариялық-карантиндік пункт жұмыс істейді. Сондай-ақ Пандемия қорының жобасы аясында аталған пункттерді қажетті жабдықтармен жарақтандыру және қадағалау жүйесін цифрландыру жұмыстары жүргізілуде.
Тренинг өткізу ұлттық сарапшылық әлеуетті нығайтуға, сондай-ақ Қазақстанның қоғамдық денсаулыққа төнетін қатерлерді уақтылы анықтау және оларға жедел ден қоюға дайындығын арттыруға бағытталған.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
