Астанада тұтынушыға сапасыз кепілдік қызмет көрсетілгеннен кейін ноутбуктың толық құны қайтарылды. Астана қаласы бойынша Сауда және тұтынушылардың құқықтарын қорғау департаментінің көмегімен дау сотқа дейінгі тәртіппен шешілді.
Елорда тұрғыны құны 480 мың теңге болатын ноутбук сатып алған. Пайдалану барысында құрылғы мезгіл-мезгіл қатып қалып, өздігінен қайта жүктеле бастаған. Ақауды жою үшін тұтынушы сервистік орталыққа жүгініп, техниканы кепілдік жөндеуге тапсырған.
Алайда екі аптадан кейін жағдай одан әрі нашарлаған. Ноутбукты алуға келгенде бастапқы ақаудың жойылмағаны, ал құрылғы корпусында жаңа механикалық зақым — бұрышында майысқан жер пайда болғаны анықталған.
Сонымен қатар, ноутбукты қабылдау кезінде сервистік орталық қызметкерлері тұтынушыға техниканың бастапқы сыртқы жағдайы толық сипатталған құжатты бермеген.
Сатып алушы сатушыға зақымдарды жою және сапалы жөндеу жүргізу туралы талаппен жазбаша шағым жолдаған. Алайда оның өтініші жауапсыз қалған.
Дауды өз бетінше шеше алмаған тұтынушы Астана қаласы бойынша Сауда және тұтынушылардың құқықтарын қорғау департаментіне көмек сұрап жүгінген.
Департамент мамандары құқықтық және түсіндіру жұмыстарын жүргізіп, нәтижесінде дау сотқа жүгінбей шешілді.
Нәтижесінде тұтынушыға ноутбуктың толық құны - 480 000 теңге қайтарылды.
Департамент мамандары техниканы жөндеуге тапсырған кезде құрылғының сыртқы жағдайы толық сипатталған қабылдау-тапсыру актісін талап ету маңызды екенін еске салады. Бұл тауардың тапсырылған сәттегі жағдайын тіркеуге және дау туындаған жағдайда өз құқықтарын қорғауға көмектеседі.
Бұл жағдай кепілдік жөндеу қызметтерін көрсету кезінде тұтынушылардың құқықтарын сақтау және келіп түскен шағымдарды уақтылы қарау қаншалықты маңызды екенін көрсетеді.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
