Абай ауданында Мемлекет басшысы Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын талқылауға арналған аудан активінің отырысы өтті.
Жиынға мемлекеттік органдардың, кәсіпорындар мен ұйымдардың, қоғамдық бірлестіктердің, еңбек ұжымдары мен азаматтық қоғамның өкілдері қатысты.
Отырысты ашқан аудан әкімі Президент айқындаған міндеттердің стратегиялық маңызын атап өтіп, оларды жергілікті деңгейде жүйелі әрі нәтижелі жүзеге асыру қажеттігіне тоқталды.
Жиын барысында инфрақұрылымды ауқымды жаңғырту, өнеркәсіптік әлеуетті дамыту, инвестиция тарту, кәсіпкерлікті қолдау және халықтың өмір сүру сапасын арттыру мәселелері кеңінен талқыланды.
Мемлекет басшысының бастамасымен қолға алынған «Халықтық құрылыс» бағдарламасына ерекше назар аударылды. Бұл бағдарлама инфрақұрылымды кешенді жаңартуға және тұрғындардың өмір сүруіне қолайлы, заманауи жағдай жасауға бағытталған.
Ауқымды инфрақұрылымдық жобаларды іске асыру инженерлік желілер мен тіршілікті қамтамасыз ету нысандарының жағдайын жақсартумен, елді мекендерді абаттандырумен қатар, жергілікті тұрғындарды жұмыспен қамтуға жаңа мүмкіндіктер ашып, экономикалық белсенділікті арттыруға және ауданның тұрақты дамуына серпін беруге тиіс екені атап өтілді.
Сондай-ақ отырыста экономиканы әртараптандыру, өнеркәсіп саласын технологиялық жаңғырту және қолайлы инвестициялық ахуал қалыптастыру жөніндегі міндеттер қаралды.
Қолданыстағы кәсіпорындарды қолдау, шағын және орта бизнесті дамыту, жаңа инвестициялық бастамаларды жүзеге асыру және сапалы жұмыс орындарын ашудың маңыздылығы атап көрсетілді.
Жиынға қатысушылар әлеуметтік әділдікті қамтамасыз ету, халықтың әл-ауқатын арттыру және мемлекеттік органдар мен қоғам арасындағы өзара байланысты нығайту мәселелеріне де ерекше көңіл бөлді.
Мемлекеттік бастамаларды жүзеге асырудағы азаматтық қоғамның рөлі, тұрғындармен ашық диалог орнату, олардың пікірін ескеру және қоғамдық жауапкершілікті арттыру мәселелері талқыланды.
Осы орайда қоғамдық бірлікті нығайтуға, адал еңбек мәдениетін қалыптастыруға және туған жерге жанашырлықпен қарауға бағытталған «Заң мен тәртіп», «Адал азамат» қағидаттары мен «Таза Қазақстан» жалпыұлттық бастамасының маңыздылығы атап өтілді.
Жиынды қорытындылаған аудан әкімі Мемлекет басшысының Жолдауын іске асыру мемлекеттік органдардың, кәсіпорындардың, кәсіпкерлік қауымдастық пен қоғамдық институттардың жүйелі әрі үйлесімді жұмысын талап ететінін атап өтті.
Ауданның әлеуметтік-экономикалық дамуын қамтамасыз ету және тұрғындардың тұрмыс жағдайын жақсарту жолындағы нақты нәтижелер басты бағдар болуы тиіс.
Отырыс қорытындысы бойынша Президент Жолдауында белгіленген міндеттерді жүзеге асырудың негізгі бағыттары айқындалды. Бұл ретте басшылардың дербес жауапкершілігін арттыруға, қабылданатын шешімдердің тиімділігіне және нақты нәтижелерге қол жеткізуге басымдық берілді.
Басты міндет – елімізде жүзеге асырылып жатқан ауқымды өзгерістердің оң нәтижесін ауданның әрбір тұрғыны күнделікті өмірінде сезінуін қамтамасыз ету.
Әлеуметтік желілерде memleket.kz-ке жазылыңыз
Қазақстанның маңызды жаңалықтары мен пайдалы материалдары — өзіңізге ыңғайлы платформада.
