18 жастан асқан адамдарға мүгедектікті 5 жыл мерзімге белгілеу тәртібі туралы

18 жастан асқан адамдарға мүгедектікті 5 жыл мерзімге белгілеу тәртібі туралы

Қазақстан Республикасы Еңбек және халықты әлеуметтік қорғау министрінің 2023 жылғы 29 маусымдағы № 260 бұйрығымен бекітілген Медициналық-әлеуметтік сараптама жүргізу қағидаларының 7-2-қосымшасында мүгедектікті 5 жыл мерзімге белгілеуге негіз болатын аурулар мен кемістіктердің тізбесі қарастырылған.

Оларға келесі аурулар мен жағдайлар жатады:

1. Тыныс алу және қанайналым жүйесінің аурулары. Тыныс алу жеткіліксіздігінің III дәрежесі, өкпе-жүрек жеткіліксіздігі, сондай-ақ ауыр функционалдық бұзылыстармен жүретін қанайналым жүйесінің аурулары.
2. Жүйке жүйесінің аурулары. Созылмалы үдемелі неврологиялық аурулар, паркинсонизм плюс және ми қан тамырлары аурулары салдарынан туындайтын тұрақты айқын функционалдық бұзылыстар.
3. Қант диабеті. Ағзалар мен жүйелердің айқын бұзылыстарымен, соның ішінде ауыр тамырлық асқынулармен, ретинопатиямен және бүйрек зақымдануымен қатар жүретін жағдайлар.
4. Стомалар. Жойылмайтын нәжістік және несептік илеостома, колостома және жасанды несеп шығару жолдары.
5. Ісіктер. Қолайсыз болжамы бар, емдеуге келмейтін немесе үдейтін қатерлі ісіктер, метастаздар, сондай-ақ операция жасау мүмкін емес және айқын функционалдық бұзылыстарға әкелетін кейбір қатерсіз ісіктер.
6. Бүйректің созылмалы аурулары. Бүйректің созылмалы ауруының V сатысы, оның ішінде бүйрек трансплантациясынан кейінгі жағдайлар.
7. Жүйелі ревматологиялық аурулар. Буындар функциясының айқын бұзылуымен жүретін ревматоидты артрит, анкилозды спондилоартрит және жайылған полиостеоартроз.
8. АИТВ-инфекциясы және қан аурулары. Ағзалар мен жүйелердің айқын бұзылыстарымен жүретін АИТВ-инфекциясының IV клиникалық сатысы және ауыр дәрежелі апластикалық анемия.
9. Психикалық бұзылыстар. Орташа дәрежедегі ақыл-ой кемістігі, айқын функционалдық бұзылыстармен сипатталатын шизофрения және аутизмге байланысты белгілі бір жағдайлар.
10. Көру қабілетінің бұзылуы. Жақсы көретін көздің көру өткірлігі 0,03-ке дейін төмендеген немесе көру өрісі 10 градусқа дейін тарылған, сондай-ақ көру өткірлігі 0,04–0,08 аралығында болып, көру өрісі 20 градусқа дейін тарылған жағдайлар.
11. Эпилепсиялық жағдайлар. Жиі ұстамалармен, эпистатуспен немесе ұстамалардың сериялы ағымымен және интеллектуалдық функциялардың айқын бұзылуымен сипатталатын жағдайлар.
12. Бас сүйек ақаулары. Краниопластика жасауға келмейтін, ауданы 12 шаршы сантиметр және одан көп бас сүйек сүйегінің ақаулары.

Мүгедектікті 5 жыл мерзімге белгілеу кезінде диагноздың болуы ғана емес, аурудың ағымы, организм функцияларының бұзылу дәрежесі және тіршілік-тынысының шектелуі ескеріледі. Әрбір шешім қолданыстағы Қағидаларға сәйкес, медициналық құжаттар мен сараптамалық бағалау негізінде жеке қабылданады.