25 қазан-Республика күні — Қазақстанның мемлекеттілігі мен тәуелсіздікке ұмтылысын айқындайтын ұлттық мереке. Бұл күн халқымыздың азаттық жолындағы тарихи қадамын, елдік мұратын және болашаққа деген сенімін білдіреді. Республика күнінің тарихы 1990 жылғы 25 қазаннан басталады. Дәл осы күні Қазақ КСР Жоғарғы Кеңесі «Қазақ Кеңестік Социалистік Республикасының мемлекеттік егемендігі туралы декларацияны» қабылдады. Бұл құжат Қазақстанның мемлекеттік дербестігін нығайтуға жол ашқан маңызды тарихи шешім болды. Декларацияда республиканың аумағының тұтастығы, өз заңдарының үстемдігі, табиғи байлықтарына иелік етуі және дербес мемлекеттік саясат жүргізу қағидаттары көрініс тапты. 1991 жылғы 16 желтоқсанда Қазақстан өзінің мемлекеттік тәуелсіздігін жариялады. Осылайша, 1990 жылғы 25 қазандағы декларация еліміздің тәуелсіздікке жету жолындағы маңызды тарихи белестердің біріне айналды.
