Жетісу облысында «Еңбекпен – тәртіпке, тәртіппен – табысқа» атты облыстық бос жұмыс орындары жәрмеңкесі өтті

Іс-шара облыс прокуроры Жұмақанов Бауыржан Альбертұлы мен облыс әкімінің орынбасары Көлбаев Марлен Қапашұлының қатысуымен ұйымдастырылды. Департамент тарапынан жәрмеңкеге Департамент басшысы орынбасары Дәулетұлы Еркін қатысып, жұмыс іздеген азаматтарға құқықтары мен міндеттерін түсіндірді. Жәрмеңкеге Жетісу облысының әр ауданы мен қаласынан 100-ден астам жұмыс беруші қатысып, 400-ден астам жұмыссыз азаматқа бос жұмыс орындарын ұсынды. Жәрмеңкеге 700-ге жуық адам қатысты. Жұмыс іздеушілердің басым көпшілігі «Темірбетон» ЖШС, «Метакон» ЖШС, «ТАТЭК» АҚ, «JLC Сүт» ЖШС, «Талдықорғанкабель зауыты» ЖШС және басқа да ірі кәсіпорындарға жұмысқа орналасуға қызығушылығын білдірді. Шараның негізгі мақсаты – жұмыс іздеушілерді тұрақты жұмыспен қамтуға жәрдемдесу, жұмыс берушілер мен азаматтар арасында тікелей байланыс орнату, еңбек құқықтары мен міндеттері туралы ақпарат беру және заңды еңбек қатынастарының маңызын түсіндіру. Іс-шара концерттік бағдарламамен басталып, қатысушыларға көтеріңкі көңіл-күй сыйлады. Сонымен қатар, еңбек саласына үлес қосып жүрген бірқатар жұмыс берушілерге алғыс хаттар табысталып, марапаттау рәсімі өтті.