1 / 8
Төлеби ауданының әкімі Еркеғали Әлімқұлов Кемеқалған ауылдық округінің тұрғындарымен кездесіп, елді мекендердің әлеуметтік-экономикалық дамуына қатысты өзекті мәселелер мен алдағы міндеттерді талқылады.
Кездесу барысында округтің қазіргі ахуалы сараланып, инфрақұрылымды жетілдіру, ауыз сумен қамту, жол сапасын жақсарту, электр желілерін ретке келтіру, инвестиция тарту және жаңа жұмыс орындарын ашу бағыттары сөз болды. Аудан әкімі Еркеғали Амантайұлы елді мекендердің тұрақты дамуы мен тұрғындардың әл-ауқатын арттыруға бағытталған бастамалардың маңыздылығына тоқталды. Әсіресе, инвестициялық жобаларды іске асыру арқылы жаңа өндіріс орындарын ашу, ауыл шаруашылығының әлеуетін пайдалану және халықты тұрақты жұмыспен қамту қажеттігін атап өтті. Жиында Кемеқалған ауылдық округінің әкімі Пердебек Есқұлов 2026 жылдың бірінші жартыжылдығында тұрғындармен өткен кездесуде көтерілген мәселелердің орындалу барысы туралы баяндады. Бұған дейін көтерілген бірқатар түйткіл өз шешімін тапқан. Атап айтқанда, елді мекендердегі жолдарды жөндеу, көшелерге тас төсеу, түнгі жарықтандыру, аумақтарды абаттандыру және спорт инфрақұрылымын жақсарту бағытында нақты шаралар жүзеге асқан. Сонымен қатар ауыз су жүйелерін жаңғырту мен электр желілерін ретке келтіруге қатысты жұмыстар жалғасуда. Әңгірата елді мекеніндегі ауыз су жүйесін күрделі жөндеу жобасын 2027 жылға Ұлттық жоба аясында ұсыну үшін техникалық зерделеу жүргізілуде. Ал Дегерез және Қоңқабаба көшелеріне трансформатор орнату жоспарланған. Округтің экономикалық әлеуетін арттыру мақсатында инвестициялық бастамаларға да басымдық берілуде. Ауыл шаруашылығы саласында жеміс-жидек өңдеу цехын ашу және тауарлы сүт фермасын дамыту жобалары қолға алынған. Әлеуметтік саладағы маңызды міндеттердің қатарында Абай елді мекеніндегі мектепке қосымша корпус салу, Ақбастау ауылында Мәдениет үйін тұрғызу, спорт нысандарын көбейту және «Анаға құрмет» скверін абаттандыру бар. Жол қатынасын жақсарту бағытында «Абай-Ұйымшыл» елді мекендерін жалғайтын автомобиль жолының 3,1 шақырымында орташа жөндеу аяқталды. Сондай-ақ бірқатар көшеге түнгі жарықтандыру жүргізілді. Кездесу кезінде тұрғындар өздерін толғандырған мәселелерді ортаға салып, ұсыныс-пікірлерін жеткізді. Аудан және округ әкімдігі тарапынан көтерілген мәселелерді кезең-кезеңімен шешіп, олардың орындалуын бақылауда ұстау бағытында тиісті жұмыстар жалғасатыны айтылды.
Кездесуден кейін аудан әкімі Еркеғали Амантайұлы тұрғындарды жеке мәселелері бойынша қабылдады. Қабылдау барысында азаматтар өз өтініштері мен ұсыныстарын жеткізді. Аудан әкімі көтерілген мәселелерді заң аясында зерделеп, тиісті шаралар қабылдауды жауапты сала басшыларына тапсырды.
Төлеби ауданы әкімінің баспасөз қызметі
