«ӘН – КӨҢІЛДІҢ АЖАРЫ» МӘДЕНИ КЕШІ ӨТТІ

Ордабасы ауданының орталығы Темірлан ауылындағы орталық алаңда Қараспан және Бөржар ауылдық округтері өнерпаздарының қатысуымен «Ән – көңілдің ажары» атты мәдени кеш өтті.
Ұлттық өнерді дәріптеп, ауыл өнерпаздарының шығармашылығын насихаттауға және аға буынға құрмет көрсетуге бағытталған шара мазмұнды мәдени бағдарламаға ұласты.
Мәдени кеш аясында екі ауылдық округтің қариялары Қажымұқан музейін аралап, тарихи жәдігерлермен танысты. Одан кейін аудан әкімінің орынбасары Ілияс Тұрниязбен дастархан басында жүздесіп, ауылдардың тыныс-тіршілігіне қатысты мәселелерді талқылады.
Басқосуға аудандық ардагерлер кеңесінің төрағасы Бостандық Жәкей, ел ағалары мен ауыл ақсақалдары қатысты. Кездесу барысында қариялар елді мекендерді дамыту, тазалық пен абаттандыру және қоғамдық ортаға қатысты ой-пікірлері мен ұсыныстарын ортаға салды.
Кештің ашылуында аудан әкімінің орынбасары Ілияс Тұрнияз жиналған қауымды мәдени шарамен құттықтап, ұлттық өнердің ұрпақтар сабақтастығын нығайтудағы маңызына тоқталды.
Кеш барысында Қараспан мен Бөржар ауылдық округтерінің өнерпаздары әсем ән шырқап, мың бұралған биімен көрерменнің ықыласына бөленді. Сахнаға шыққан ақ жаулықты аналар да әннен шашу шашып, мерекелік кештің ажарын аша түсті.
«Ән – көңілдің ажары» мәдени кеші өнер арқылы ауылдар арасындағы ынтымақты нығайтып, аға буынға құрмет көрсету мен ұлттық құндылықтарды дәріптеудің жарқын үлгісіне айналды.
Ордабасы ауданы әкімінің баспасөз қызметі