Қызметтік жауапкершілік әрбір қабылданған шешімнен басталады. Жетісу облысында Төтенше жағдайлар департаментінің қызметкерлері заңдылықты сақтау, сыбайлас жемқорлыққа қарсы іс-қимыл және қызметтік тәртіпті нығайту мәселелеріне арналған семинар-кеңеске қатысты.
Іс-шараға «Әділет» партиясы филиалының және Қазақстан Республикасы Мемлекеттік қызмет істері агенттігінің Жетісу облысы бойынша департаментінің өкілдері де қатысты. Кездесу барысында қатысушылар қылмыстық және әкімшілік құқық бұзушылықтар үшін жауапкершілік, сыбайлас жемқорлық тәуекелдерінің алдын алу және заңнама талаптарын сақтау мәселелерін талқылады.
Нысандардың өрт қауіпсіздігі талаптарына сәйкестігі туралы қорытынды беретін және тиісті шешімдер қабылдайтын лауазымды тұлғалардың қызметіне ерекше назар аударылды. Өйткені әрбір осындай шешімнің артында адамдардың қауіпсіздігі тұр. Сондықтан кәсібилікпен қатар, әділдік, объективтілік және адалдық та аса маңызды.
Мұндай кездесулер қызметкерлердің құқықтық мәдениетін арттыруға, жеке жауапкершілігін нығайтуға және сыбайлас жемқорлықтың кез келген көрінісіне төзбеушілік қағидатын қалыптастыруға ықпал етеді.
Қызмет ету — өз міндеттерін орындау ғана емес, сонымен қатар заңға адалдықты сақтап, қоғамның сенімін күн сайын ақтау.
