Қарағанды академиялық музыкалық комедия театрының «Буратино» қуыршақ театр-студиясы Ресейдің Қорған қаласында өткен «Ұшу арманы. Өнер туралы сырласу» атты V халықаралық фестивальге қатысты.
Бес елдің театр ұжымдарын тоғыстырған өнер мерекесіне Ресей, Қазақстан, Беларусь, Қытай және Перуден келген әртістер жиналды.
Қарағандылық өнерпаздар көрермен назарына «Махаббат туралы аңыз» спектаклін ұсынды. Қуыршақ өнерін актерлік шеберлікпен, пластикалық қимылмен, бимен, әуезді әнмен және драмалық әрекетпен астастырған қойылым көрерменнің ыстық ықыласына бөленді.
Театр сыншылары спектакльді тың туынды ретінде бағалап, оның өзгеше атмосферасы мен көшпенділер дүниетанымы мен дәстүріне терең бойлаған мазмұнын айрықша атап өтті.
Фестиваль аясында шеберлік сабақтары, дәрістер мен дөңгелек үстелдер ұйымдастырылып, қуыршақ театрының мамандары өзара тәжірибе алмасты.
Мұндай кәсіби жүздесулер шығармашылық ізденісті тереңдетіп, сахна шеберлерінің тәжірибе көкжиегін кеңейтуге, өз жұмысына тың көзқараспен қарауға жол ашады.
